Падчас пажару ў Століне пацярпелі 7 дзяцей
Дактары Столінскай цэнтральнай раённай бальніцы правялі абследаванне і прызначылі лячэнне ўсім дзецям і дарослым, якія паступілі ў медустанову пасля пажару ў адным з дамоў на вуліцы Гагарына ў Століне, паведамляе прэс-служба Міністэрства аховы здароўя.
Столінская раённая бальніца. Фота ілюстрацыйнае
Як паведамляецца, у кватэры на трэцім паверсе дома адбылося ўзгаранне. У выніку дым трапіў у кватэры чацвёртага і пятага паверхаў.
У бальніцу шпіталізавалі 10 чалавек: 7 дзяцей (пяцёра ва ўзросце ад 3 да 8 гадоў і двое падлеткаў 15—18 гадоў) і 3 дарослыя.
Стан усіх пацярпелых ацэньваецца як сярэдняй цяжкасці або здавальняючы, пагрозы жыццю няма. Усе яны застаюцца ў стацыянары пад наглядам медыкаў.
Пацыентаў агледзелі дзяжурныя рэаніматолаг, тэрапеўт, педыятр і хірург. Ім праводзіцца неабходнае лячэнне для стабілізацыі стану: у палатах падаецца кісларод і выконваюцца іншыя працэдуры ў адпаведнасці з клінічнымі пратаколамі Міністэрства аховы здароўя.