З даведкамі замест пашпартоў выслалі за мяжу каля 20 вызваленых палітвязняў

13 снежня з месцаў пазбаўлення волі ў Беларусі былі вызваленыя 123 палітвязні, 114 з якіх пасля гэтага прымусова перамясцілі на тэрыторыю Украіны. Як стала вядома «Вясне», без пашпартоў за мяжу вывезлі каля 20 чалавек.

Даведка, з якой быў прымусова вывезены за мяжу праваабаронца Уладзь Лабковіч. Фота: «Вясна»

Сярод тых, у каго забралі пашпарты — вядомыя і медыйныя асобы, а таксама ўнесеныя ў «спіс тэрарыстаў». З беларускага боку гэта ніяк не тлумачылася. Замест пашпартоў палітвязням выдалі даведкі, якія пацвярджаюць асобу. 

На гэта на першай прэс-канферэнцыі звяртаў увагу праваабаронца «Вясны» Уладзь Лабковіч:

«Адбылася пэўная селекцыя. Чым думалі супрацоўнікі беларускіх спецслужбаў, якія арганізоўвалі гэтую спецаперацыю, я не ведаю».

Такім чынам, у выніку людзі апынуліся ў іншай краіне без дакументаў, грошай і асабістых рэчаў, у стане прававой нявызначанасці.

Гэта, аднак, ужо не першы раз, калі лукашысты такое практыкуюць. Падчас папярэдняга масавага вызвалення палітвязняў 11 верасня 2025 года частка з іх таксама апынулася па-за межамі Беларусі без пашпартоў, хоць нават у беларускім МУС казалі, што паводле закону гэта немагчыма.

Каментары да артыкула