Трамп: План па Украіне скараціўся з 28 да 22 пунктаў
«Гэта быў не план. Гэта была канцэпцыя», — сказаў прэзідэнт ЗША.
Фота: Anna Moneymaker / Getty Images
Дональд Трамп заявіў, што мірны план па Украіне скараціўся з 28 да 22 пунктаў. Пра гэта ён паведаміў, размаўляючы з журналістамі на борце прэзідэнцкага самалёта Air Force One.
Журналісты папрасілі Трампа пракаментаваць заявы некаторых рэспубліканцаў пра тое, што першапачатковы план з 28 пунктаў быў занадта «спрыяльным» для Расіі.
«Гэта быў не план. Гэта была канцэпцыя. І адтуль яны ўзялі кожны з 28 пунктаў, а затым звялі да 22 пунктаў. Паводле многіх з іх было знойдзенае рашэнне, і насамрэч вельмі спрыяльнае. Паглядзім, што з гэтага выйдзе», — сказаў Трамп.
Ён таксама заявіў пра неабходнасць тэрытарыяльных саступак з боку Украіны, спасылаючыся на прасоўванне Расіі на фронце.
«Глядзіце, як усё ідзе: калі паглядзець, усё рухаецца ў адным напрамку на фронце. Так што ў выніку гэта зямля ў найбліжэйшыя некалькі месяцаў можа і так быць захоплена Расіяй. Вы хочаце ваяваць і страціць яшчэ 50—60 тысяч чалавек? Ці хочаце зрабіць нешта цяпер?» — сказаў прэзідэнт ЗША.
Раней паведамлялася, што пасланнік прэзідэнта ЗША Стыў Уіткаф прыедзе на наступным тыдні ў Маскву, каб сустрэцца з Пуціным.