Меркаваная пазашлюбная дачка Лукашэнкі ўладкавалася на новую працу — яна звязаная з хакеем
Крысціна Моцная знайшла прымяненне сваім дызайнерскім талентам.
Крысціна Моцная падзялілася ў сацсетках, што ўладкавалася на новую працу.
«Нейкім чынам я цяпер працую дызайнерам у хакейным клубе», — пахвалілася сваім падпісантам у інстаграме дзяўчына.
Мяркуючы па працоўных відэазамалёўках, гаворка ідзе пра мінскае «Дынама», галоўны хакейны клуб Беларусі.
Скрыншот: інстаграм: @kressmots
У снежні 2024 года журналісты-расследавальнікі з «Бюро» высветлілі, што ў свой час Лукашэнка быў блізкі са сваёй цырульніцай Сняжанай Моцнай.
Сняжана і Крысціна Моцныя. Фота: інстаграм @snezhana.motsnaya
У лютым 2000 года ў Сняжаны нарадзілася дачка Крысціна. Ні на той момант, ні пасля Сняжана Моцная замужам афіцыйна не была. Яна і па сёння носіць сваё дзявочае прозвішча. У графе «бацька» ў Крысціны пазначылі Аляксандра Рыгоравіча Моцнага, але такога чалавека ў Беларусі ніколі не існавала. Па гэтых і іншых сведчаннях журналісты выказалі здагадку, што Крысціна з’яўляецца пазашлюбнай дачкой Лукашэнкі.
Крысціна Моцная. Фота з архіва сям’і
Крысціна захапляецца дызайнам даўно. У 2022 годзе дзяўчына скончыла Мінскі дзяржаўны лінгвістычны ўніверсітэт, дзе акцэнт рабіла на вывучэнне англійскай і нямецкай моў, і першапачаткова планавала быць настаўніцай нямецкай мовы (чым вельмі ганарылася яе маці). Але знайшла сябе ў такой сферы, як графічны дызайн.
У 2023 годзе Крысціна скончыла навучанне ў расійскім «Бюро Гарбунова». Пасля працавала спецыялісткай па знешнеэканамічнай дзейнасці ў кампаніі ТАА Izovac, што вырабляе вакуумныя ўстаноўкі. Дызайн жа нейкі час заставаўся для яе падпрацоўкай на фрылансе, цяпер жа стаў асноўнай працай.
Крысціна Моцная. Фота з архіва сям’і
Дарэчы, акурат нядаўна маці Крысціна дзялілася ў сваіх сацсетках, што адпусціла дачку ў свабоднае плаванне — жыць асобна. Відаць, такія перамены ў тым ліку звязаныя з новай стабільнай працай.
Чытайце таксама:
У Лукашэнкі знайшлася пазашлюбная дачка Крысціна? Вось што вядома
Як жыве і чым займаецца Крысціна Моцная — меркаваная пазашлюбная дачка Аляксандра Лукашэнкі
Як Коля Лукашэнка наведаў краму пад Оршай і ўчыніў пярэпалах