ЗША выпрабавалі ракету Minuteman III, а Пуцін сабраў Раду бяспекі
Злучаныя Штаты Амерыкі правялі выпрабавальны запуск міжкантынентальнай балістычнай ракеты Minuteman III без баявой часткі. Як паведамілі ў Камандаванні касмічных сіл ЗША, запуск адбыўся 5 лістапада ў 01:35 па ціхаакіянскім часе з авіябазы Вандэнберг у Каліфорніі.
Падрыхтоўка ракеты Minuteman III. Здымак ілюстрацыйны. Фота: John Turner / U.S. Air Force via AP
Ракета праляцела каля 6700 кіламетраў і дасягнула палігона на атоле на Маршалавых астравах. Паводле даных вайскоўцаў, выпрабаванне было планавым і прызначалася для праверкі надзейнасці, дакладнасці і баявой гатоўнасці комплексу Minuteman III, максімальная далёкасць якога складае каля 9500 кіламетраў.
У Камандаванні касмічных сіл ЗША падкрэслілі, што запуск не мае дачынення да нядаўняй заявы Дональда Трампа адносна магчымага аднаўлення ядзерных выпрабаванняў у ЗША.
Тым часам прэзідэнт Расіі Уладзімір Пуцін даручыў МЗС, Міністэрству абароны, спецслужбам і іншым ведамствам падрыхтаваць прапановы наконт магчымасці аднаўлення ядзерных выпрабаванняў — упершыню за апошнія 35 гадоў. Пра гэта ён паведаміў падчас нарады з пастаяннымі членамі Рады бяспекі ў Крамлі.
Па словах Пуціна, усе гэтыя структуры павінны сабраць дадатковую інфармацыю, прааналізаваць яе і прадставіць узгодненыя прапановы аб тым, ці варта пачынаць падрыхтоўку да выпрабаванняў.
Міністр абароны Андрэй Белавусаў прапанаваў пачаць падрыхтоўку да поўнамаштабных выпрабаванняў на палігоне Новая Зямля ў Архангельскай вобласці, дзе апошні ядзерны выбух адбыўся ў 1990 годзе.
Раней Пуцін заяўляў пра завяршэнне выпрабаванняў расійскіх ядзерных распрацовак — ракеты «Буравеснік» і ядзернай тарпеды «Пасейдон».
Чытайце таксама:
На гэтым тыдні ЗША правядуць выпрабаванне міжкантынентальнай балістычнай ракеты