«Нарэшце!» Людзі на ўра ўспрынялі навіну аб увядзенні штрафаў за слабы інтэрнэт і прапануюць, з якога аператара пачаць
Інфармацыя пра тое, што Мінсувязі збіраецца штрафаваць пастаўшчыкоў інтэрнэту за нізкую якасць паслугі, выклікала бурнае абмеркаванне. Людзі масава скардзяцца на якасць сувязі.
Ілюстрацыйны здымак. Фота: сацсеткі
Адпаведны ролік у тыктоку за два дні набраў амаль 31 тысячу лайкаў, быў 16 тысяч разоў перапошчаны і сабраў амаль 2400 каментарыяў.
Лідарамі па колькасці лайкаў сталі каментары, аўтары якіх дзівяцца з таго, што дзяржава сапраўды будзе штрафаваць сваіх жа.
Так заўвага-пытанне «Дзяржава будзе штрафаваць дзяржаўны «Белтэлекам» і «Воблачныя тэхналогіі»?» набрала амаль 4500 лайкаў.
А пытанне-прапанова «Будуць штрафаваць МТС? Даўно пара» — больш за 3000 лайкаў.
На трэцім месцы (звыш 1200 лайкаў) — заўвага пра якасць інтэрнэту ў аператара А1.
«А1 у апошні час наогул жудасны інтэрнэт. Напэўна, буду пераходзіць на МТС», — напісаў адзін з гледачоў і атрымаў адказ:
«Не варта. МТС такое ж дно».
Пра тое, што ў МТС не лепшая інтэрнэт-сувязь, сведчаць і іншыя:
«Я спадзяюся, МТС першы ў спісе на штраф?».
«МТС увогуле апошнім часам жудасны. І сувязь, і інтэрнэт. А грошы дзяруць вялікія»
«МТС на раёне толькі 3G цягне».
«Пачніце з «Белтэлекама»
Масава наракаюць і на «Белтэлекам»:
«Пачніце з «Белтэлекама», калі ласка, людзі добрыя».
«Апошнім часам тэлебачанне ZALA ад «Белтэлекама» немагчыма глядзець, каналы лагаюць. Пра інтэрнэт пасля 22:00 увогуле маўчу, ледзь цягне».
«Плацім за «Белтэлекам» 40‑50 рублёў у месяц, інтэрнэт 6 Мбіт/с, дзякуем вельмі, што да кухні не дастае, і хатні інтэрнэт ёсць толькі ў адным пакоі».
«Пасля 7‑й вечара «Белтэлекам» не дае добрага злучэння. МТС у доме ўжо не ловіць».
«Лайф даўно пара»
Ёсць прэтэнзіі і да Лайфа.
«Лайф даўно пара».
«Лайф нідзе не ловіць, а калі і ловіць, то нічога не грузіць».
Па краіне 3G, месцамі 2G
Гледачы прыводзяць прыклады хуткасці інтэрнэту.
«У мяне наогул бывае, інтэрнэт сам адключаецца, а потым праз 3‑5 секунд уключаецца, ды і ідзе ён сам жудасна, па 400 Кбіт/с, бывае, нават і 1 Кбіт/с».
«Па краіне 3G, месцамі 2G, а плату бяруць спраўна. На А1 наогул жах, а не інтэрнэт».
«4G+ (усе палачкі ёсць) — і хуткасць інтэрнэту: 1,7‑2 Мбіт/с».
«Ахахах, 4G+ і хуткасць перадачы 80 Кбіт/с, так што табе яшчэ пашанцавала».
«Нават гэтае відэа гляджу з лагамі».
«Нарэшце. Няўжо»
Гледачы выказваюць спадзяванне, што сітуацыя зменіцца да лепшага пасля ўвядзення штрафаў:
«Нарэшце, а то плаціш за самы хуткасны інтэрнэт, а атрымліваеш жудасную якасць».
«Няўжо, спадзяюся, Белтэлекам адновіць сваю хуткасць, а то я пакуль не разумею, за што плачу каля 100 рублёў у месяц».
Нехта аўтарытэтна заўважае:
«Кажуць, што не могуць з-за санкцый у Еўропе купіць абсталяванне, дык у чым праблема ў кітайцаў купіць? У іх 5G-вышкі ўжо даўно прадаюцца, і тэлефоны з 5G, а ў нас вышэй за LTE няма, хоць яны ж нам і прадаюць свае тэлефоны з 5G».
Карыстальнікі з іншых краін выказваюць захапленне навацыяй беларускіх чыноўнікаў:
«Пакуль у Расіі забіваюць інтэрнэт, Беларусь яго аднаўляе», — заўважае адзін з чытачоў.
«Яшчэ адна такая навіна, і я купляю білет у Беларусь».
«У Казахстан бы такое!»
«У Расію б такія законы!»
Чытайце таксама:
За павольны інтэрнэт у Беларусі будуць штрафаваць
Мужчыны і Лукашэнка: беларусы шукаюць вінаватых у дэмаграфічнай катастрофе
Усе мабільныя аператары запусцілі базавы тарыф. У каго самы танны?