У тэлеграм-каналах беларускіх чыноўнікаў дазволена толькі захапляцца. Крытычныя рэакцыі пад забаронай

Выданне BGmedia вывучыла тэлеграм-каналы аблвыканкамаў і райвыканкамаў Беларусі. Аказалася, што сумныя або крытычныя рэакцыі там пад забаронай.

У афіцыйных тэлеграм-каналах беларускіх органаў улады сумаваць забаронена. Ніякіх «палец уніз», «гаўняшак» ці нават нейтральных смайлікаў — толькі радасць, гонар і трыумф.

Маніторынг BGmedia паказаў: для чыноўнікаў галоўнае, каб у каментарах панавала атмасфера ўсеагульнага «адабрамсу», а незадаволенасць раствараецца ў сэрцайках і агеньчыках.

Брэст: можна амаль усё, Віцебск і Магілёў: радасць па статуце

Брэсцкі аблвыканкам аказаўся самым ліберальным — тут можна здзіўляцца, смяяцца і нават злёгку іранізаваць. Праўда, строга абмежавана: «палец уніз» або «клоўна» не завезлі.

Тая ж карціна і ў гарадскім канале «Любимый Брест». Смутак і сарказм — пад забаронай.

У тэлеграм-канале Віцебскага аблвыканкама карыстальнікі могуць толькі захапляцца або, у крайнім выпадку, «узяць пад казырок». Для разнастайнасці дадалі «здзіўленыя вочы» і чырвона-зялёны сцяжок — патрыятызм у рэакцыях абавязковы.

У Магілёўскага гарвыканкама крыху весялей — даступнае «здзіўленне», а ў канале «Исаченко онлайн» (канал старшыні аблвыканкама) выбар сціснулі да чатырох кнопак: «сэрцайка», «лайк», «агеньчык» і «апладысменты». Апладысменты — гэта важна.

Брэсцкія ўлады ў тэлеграм дазволілі розныя рэацыі. Скрын

Гродна: трохі «болю», Гомель: свята без перапынку

Гродзенскі аблвыканкам дазволіў тры негатыўныя эмоцыі з шаснаццаці: «палец уніз», «узарваны мозг» і нават «няма цэнзурных слоў». Здаецца, гэта максімум фронды, на якую адважыліся чыноўнікі.

Гарадскі канал аказаўся куды стражэйшы: толькі радасць, сэрцайкі і пераможныя смайлікі.

У Гродне чытачам праўладных ТГ-каналаў нельга сумаваць. Скрын

Гомельскі аблвыканкам прапанаваў аж 16 рэакцый, але ніводнай нават нейтральнай. Толькі трыумф, радасць і захапленне.

Канал старшыні гарвыканкама «Владимир Привалов. Официально» таксама трымае марку — усе сем рэакцый выключна пазітыўныя.

Цэнтральны раён Гомеля для разнастайнасці дазволіў адну сумную кнопку — «плачу». Астатнія — радасць і весялосць.

Віцебскія чыноўнікі ў тэлеграме дазволілі толькі пазітыў. Скрын

Мінскі гарвыканкам аказаўся самым «стрыманым» на эмоцыі — тут не паставіш наогул нічога. Нават «ганаруся» ці «трыумфую». Поўнае маўклівае захапленне.

Як і ў канале «Пул Первого» (самі ведаеце чый канал). Тут тая ж схема: рэакцыі адключаныя, чытайце і захапляйцеся моўчкі.

Вынікі такія: самыя скупыя на эмоцыі чытачоў, акрамя «суперсквапных», як у Мінску — магілёўскія і гродзенскія ўлады.

Раёны: ад «гаўняшкі» да «выбуху мозгу»

У раёнах фантазія чыноўнікаў па-свойму крэатыўная. Петрыкаўскі раён дазваляе толькі радасць і захапленне,

Кобрынскі — шырокі спектр, але без «пальца ўніз».

Шчучынскі райвыканкам нечакана пайшоў супраць плыні і праявіў дзівосную крэатыўнасць — дадаў смайлік «гаўняшка».

Ельскі — абмежаваўся дванаццаццю варыянтамі, практычна ўсе пазітыўныя.

А Лунінецкі аказаўся самым смелым: тут дазволілі і «ўзрываць мозг», і выказваць эмоцыю «няма цэнзурных слоў».

Лунінецкія чыноўнікі дазволілі «выбух мозгу» ў сваім тэлеграм-канале. Скрын 

Каментары да артыкула