Некаторыя іпэшнікі з новага года не змогуць гандляваць праз маркетплэйсы
З 2026 года не змогуць прадаваць тавары на маркетплэйсах індывідуальныя прадпрымальнікі, дзейнасць якіх будзе прызнаная аптовым гандлем. Пра гэта паведаміла Міністэрства эканомікі ў сувязі з новымі правіламі вядзення аптовага гандлю, піша «Экономическая газета».
Фота: Maksim Konstantinov / SOPA Images / LightRocket via Getty Images
Паводле тлумачэння ведамства, індывідуальныя прадпрымальнікі змогуць прадаваць на маркетплэйсах толькі ў тым выпадку, калі гэта тавары ўласнай вытворчасці. Калі ж прадпрымальнік проста перапрадае чужыя тавары, то гэта будзе лічыцца аптовым гандлем — а ён не ўваходзіць у пералік відаў дзейнасці, дазволеных для ІП з 2026 года.
Такім чынам, напрыклад, вырабляць і прадаваць уласную прадукцыю праз Wildberries можна будзе і надалей, а вось прадаваць купленыя тавары — ужо нельга.
Згодна з законам ад 22 красавіка 2024 года, індывідуальныя прадпрымальнікі змогуць займацца толькі тымі відамі дзейнасці, якія ўключаныя ў афіцыйны пералік. Парушэнне гэтага патрабавання пасля 1 студзеня 2026 года будзе лічыцца незаконнай прадпрымальніцкай дзейнасцю і карацца штрафам або канфіскацыяй да 100% атрыманага даходу.
Чытайце таксама:
Беларускім іпэшнікам упершыню за апошнія гады думаюць палегчыць умовы працы. Што плануюць змяніць
Мінімальную пенсію беларускага іпэшніка назвалі ў Мінпрацы. Гэта маленькія грошы
Новыя стаўкі падаткаў у 2025 годзе. Колькі і за што давядзецца плаціць?