У Гомелі па крымінальнай справе арыштавалі былога палітвязня і ягоную жонку
У гомельскім СІЗА № 3 цяпер утрымліваюцца былы палітвязень Станіслаў Мачалаў і ягоная жонка Святлана Якубовіч. Пра гэта стала вядома ад чалавека, які раней таксама знаходзіўся ў гэтым ізалятары, піша «Гомельская вясна».
Станіслаў Мачалаў і Святлана Якубовіч
Святлану Якубовіч затрымалі яшчэ ў канцы мінулага года, а ўжо 19 снежня 2024 года праваабаронцы прызналі яе палітычнай зняволенай. Паводле іх звестак, жанчыне выставілі абвінавачанне па арт. 357 Крымінальнага кодэкса — «змова з мэтай захопу ўлады неканстытуцыйным шляхам».
Што да Станіслава Мачалава, то пасля таго, як ён 30 снежня 2023 года выйшаў з турмы, адбыўшы трохгадовы тэрмін, інфармацыі пра яго доўгі час не было. У 2022 годзе яго асудзілі па арт. 342 (удзел у дзеяннях, што парушаюць грамадскі парадак) і арт. 364 (пагроза гвалтам у дачыненні да прадстаўніка ўлады).
24 лютага 2022 года, калі Станіслаў знаходзіўся ў тым жа СІЗА, ён ажаніўся са Святланай Якубовіч, якая перадавала яму перадачы і падтрымлівала яго.
Цяпер праваабаронцы высвятляюць, па якіх артыкулах абвінавачваюць Станіслава Мачалава і ці пачаўся ўжо суд над ім і Святланай Якубовіч.
Акрамя таго, у канцы верасня стала вядома, што Ігар Мачалаў, брат Станіслава, таксама стаў ахвярай палітычнага пераследу — яго прызналі вінаватым у «садзейнічанні экстрэмісцкай дзейнасці» (арт. 361‑4 КК). Паводле папярэдніх звестак, яму прызначылі пакаранне, не звязанае з пазбаўленнем волі.
Чытайце таксама:
Што чуваць у Соф'і Сапегі? Вось што мы даведаліся ў яе сяброў
Па «справе Гаюна» арыштавалі заснавальніка арт-вёскі на Гомельшчыне
Мінскі гарадскі суд не вытрымлівае нагрузкі — не паспяваюць судзіць палітвязняў