Шэрыя схемы, стрымы казіно і адпачынак у Дубаі. Вось як жыве і на чым зарабляе тыктокер Улад Белавусаў

Улад Белавусаў (Belousov10) — тыктокер-мільённік. У 2023‑м ГУБАЗіК затрымліваў яго разам з братам і ставіў на калені за ўдзел у пратэстах у 2020-м. Цяпер жа хлопец транслюе заможнае жыццё, бясконцыя падарожжы і адпачынак. Але зарабляе ён сумнеўнымі спосабамі — расказваем, якімі менавіта.

Улад Белавусаў. Фота з ягонага інстаграма, апрацаванае нейрасеткай

Уладу Белавусаву 29 гадоў. Ён родам з Оршы. З дзяцінства хлопец займаўся лёгкай атлетыкай, але пасля пачаў гуляць у хакей на траве. І гэтае хобі стала прафесіяй.

Спачатку ён два гады гуляў за клуб «Гомель», а пасля — за «Мінск». Цяпер ужо скончыў спартовую кар'еру.

Фота: інстаграм Белавусава

Улад з сям'і спартоўцаў — яго пачынала трэніраваць маці, прафесійная трэнерка па хакеі на траве. Ягоны брат Андрэй Белавусаў — таксама папулярны тыктокер і гулец.

Харызматычны спартовец пачаў весці тыкток пяць гадоў таму. Па прызнанні хлопца, гэта яшчэ і дапамагае папулярызаваць улюблёны спорт — на матчы ХК «Мінск» пачалі прыходзіць яго падпісчыкі. 

Падчас гульні. Белавусаў — крайні злева. Фота з ягонай старонкі Укантакце

Улад здымае звычайны тыктокавы кантэнт, у яго цяпер больш за 2,5 мільёна падпісчыкаў у тыктоку і яшчэ амаль 900 тысяч чалавек у інстаграме.

А ў 2022‑м хлопца затрымалі губазікаўцы. Улад удзельнічаў у пратэстах у Мінску разам з братам Андрэем, якога таксама затрымалі. Яны абышліся суткамі.

Але вялікіх грошаў на тыктоку не заробіш — а Уладу, відаць, вельмі хацелася. Спакуса лёгкіх грошаў закруціла хлопцу галаву, і ён палез у шэрыя спосабы заробку.

Ад мутных схем да адкрытага скаму

У ліпені 2021 года Белавусаў адкрыў праект Belousov Crypto. Там ён распавядае, як спрабуе зарабіць на крыптавалютах. Тады хлопец зарабляў сам і даваў рэферальныя спасылкі на платформы, на якіх актыўнічаў.

Яго папракалі ў тым, што ён «пампіў» крыптаманеты, якія пасля прадаваў з выгадай для сябе, а ягоныя падпісчыкі заставаліся ні з чым. Праверыць гэта цяжка, але такая схема існуе — папулярны блогер заклікае купляць крыптавалюту, тая падымаецца ў цане, і ён прадае яе на піку. Астатнія прадаюць яе па меншым кошце, а некаторыя застаюцца ні з чым.

Адзін з негатыўных водгукаў на праект Белавусава

Мутны праект, у які ўлез Белавусаў — рэклама анлайн-гульні Ракетка, якую ён піярыў на пачатку 2023 года. Гэта махлярская гульня кшталту казіно. Блогеры кажуць, што нібыта ведаюць, як яе падмануць і дзеляцца нейкімі стратэгіямі, хоць насамрэч гульня працуе цалкам на баку сэрвіса і створаная так, каб там прайгравалі грошы.

Белавусаў хваліўся, што зарабляе там грошы і запрашаў туды людзей па рэферальнай спасылцы. Насамрэч грошы яму, хутчэй за ўсё, ішлі ад таго, што прайгравалі ягоныя падпісчыкі.

Рэклама Ракеткі на канале ў Белавусава пад назвай Belousov Rocket

Арбітраж трафіка і падзенне на дно

У маі 2023 ён заняўся арбітражам трафіка і прыцягваў шмат людзей на свой новы тэлеграм-канал. Спачатку ён зарабляў на тым, што гнаў трафік сам. Пасля ён запусціў курс па арбітражы.

Паралельна Белавусаў пачаў паказваць сваё прыгожае жыццё. Цэлымі днямі — тусоўкі, вандроўкі ў Дубай і Еўрасаюз, дарагія машыны і прыгожыя жанчыны. Паралельна паказваў, што купіў маці кватэру, а брату машыну.

Белавусаў у Маскве. Фота з ягонага тэлеграм-канала

Белавусаў даваў меседж падпісчыкам — маўляў, ідзіце да нас вучыцца і будзеце жыць так жа, выцягнеце сям'ю з галечы. У арбітражы трафіку сапраўды можна добра зарабіць. Але ёсць нюансы.

Увогуле, у арбітражу трафіка нічога дрэннага няма. Гэта проста прыцягненне трафіка на рэсурс з дапамогай рэкламы. Шмат тут не заробіш, калі ты не круты эксперт.

Курсы Белавусава, калі меркаваць па ягоным канале, вучаць у асноўным таму, як зарабляць на так званым шэрым арбітражы. Ідэя ў тым, каб падмануць рэкламныя платформы (Google Ads, Facebook, TikTok, кантэкст, push‑сеткі) і змусіць іх рэкламаваць тое, што там рэкламаваць забаронена.

Улад Белавусаў паказвае прыгожае жыццё для сваіх падпісчыкаў

У акаўнце, які ўказаны як кантактны, нам расказалі пра кірункі, па якіх працуе праект Белавусава:

• Гэмблінг. Гэта казіно і іншыя азартныя гульні.
• Нутра. Гэта біядабаўкі і касметыка, якія часта прадаюцца па завышаных цэнах, а іхнія якасці выдуманыя.
• Дэйтынг. Звычайна ў такіх выпадках гэта значыць — сэрвісы для сэкс-знаёмстваў, частка з якіх скамерскія.
• Бэтынг. Стаўкі на спорт, у тым ліку ў нелегальных букмекерскіх канторах.
• e‑commerce. Пад гэтай абстракцыяй можа хавацца што заўгодна.
• Трафік на мабільныя праграмы. Часта — таксама казіно і іншыя азартныя гульні.

Адказ ад службы падтрымкі курса Белавусава

З гэтых кірункаў цалкам белы — толькі e‑commerce. Праўда, у сваім канале Белавусаў не публікуе скрыншотаў з рэкламы нічога, акрамя казіно. У курсе ён прапануе тым, хто купіць курс, загатоўкі так званых крэатываў — гатовых банэраў пад рэкламу азартных гульняў.

Прапанова ад Белавусава ў ягоным канале

Шэрыя арбітражнікі пазбягаюць адказнасці тым, што амаль ніколі не жывуць у тых краінах, па якіх працуюць. Жывучы ў Беларусі, Расіі ці Эміратах яны «заліваюць» трафік на ЗША, Лацінскую Амерыку ці Еўрасаюз. Схапіць такіх арбітражнікаў даволі цяжка — яны выкарыстоўваюць складаную сістэму пазбягання ідэнтыфікацыі, карыстаюцца крыптавалютамі, сеткамі проксі і рэгіструюць шмат якія акаўнты на падстаўных асобаў («дропаў»).

Адзін з шэрых арбітражнікаў, які працуе з Грузіі, расказаў «Нашай Ніве», што на шэрым арбітражы, калі працаваць на сябе і не пераходзіць у зусім крымінал кшталту крамаў наркотыкаў, можна зарабляць ад $5 тысяч на месяц, калі пашчасціць і калі надзяляць гэтаму паўнавартасныя восем гадзін на дзень.

Прыбытак выводзіцца ў крыптавалюты, а пасля — у наяўныя. Пры патрэбе «адбяліць» даход гэта робіцца праз ІП у Грузіі ці ў іншых краінах, у якіх падатковыя мала цікавяцца рэальнай крыніцай даходаў.

Сам Улад рэкламуе анлайн-казіно. У гэтым выпадку ён зарабляе на тым, што чалавек рэгіструецца і ўносіць дэпазіт.

На ўсіх скрыншотах у ягоным канале — скрыншоты Рулеткі на іспанскай, англійскай і іншай мовах

Каштуюць курсы ад $620 за тарыф «Усё сам» да $1110 за тарыф VIP. Курсы робяцца праз беларускае ІП Белавусава. Складу трэнераў на сайце няма, як няма і доказаў рэальнай эфектыўнасці курса.

Расцэнкі на курсы Белавусава на ягоным сайце ў расійскіх рублях

Пытанні ёсць да загадкавага крыптабота K2 Invest, якога рэкламаваў Белавусаў. Схема такая — рэгіструешся на біржы, падключаеш за грошы таямнічага бота і ён расказвае табе, як гандляваць.

Ніякіх незалежных водгукаў на гэты бот і праект няма. Невядомыя і аўтары праекта, якія прадстаўляюцца топавымі трэйдэрамі, а бот не выпускае абяцаныя справаздачы пра прыбытковасць. Агулам гэта выглядае як падман.

Белавусаў піярыў яго з кастрычніка 2024 года і да красавіка 2025‑га. 

Адно з паведамленняў Белавусава пра крыптабот

Адкрыты скам — рэклама казіно на стрымах Kick

У верасні 2025‑га Белавусаў пачаў адкрыта зарабляць на стрымах на платформе Kick. Гэта стрымінгавы сервіс кшталту Twitch, але афіляваны з анлайн-казіно і іншымі незаконнымі гэмблінгавымі платформамі. На ёй стрыміць і скандальны блогер Mellstroy.

Анонс свежага стрыма Белавусава на платформе Kick

Белавусаў на стрымах нешта глядзіць, а паралельна рэкламуе нелегальныя анлайн-казіно. Ён расказвае пра казіно як забаву і як спосаб зарабіць, расказвае пра свае неймаверныя выйгрышы.

У рэчаіснасці блогеры атрымліваюць працэнт ад прайграных падпісчыкамі грошай, і гэта самы выгадны шлях партнёрства з анлайн-казіно. Блогеру можа даставацца да 50-70% прайграных грошай.

Такая рэклама накіраваная на залежных ад гэмблінгу і ўразлівых людзей, якія прайграюць там велізарныя грошы, часта залазячы ў крэдыты і прадаючы сямейныя рэчы. У Беларусі такая рэклама цалкам забароненая.

Спачатку Белавусаў рэкламаваў казіно Arcada. Вось анонс і рэферальная спасылка Белавусава ў ягоным канале.

Рэклама казіно Arcada у канале Белавусава

А вось адзін з тыповых водгукаў на гэтае казіно.

Водгук на казіно Arcada

Далей ён перайшоў на рэкламу казіно Martin. Гэта яшчэ адно нелегальнае казіно з сумнеўным рэйтынгам.

Рэклама казіно Martin у канале 

У Беларусі азартныя анлайн‑гульні легалізаваныя, але вельмі строга рэгулююцца. У 2025 годзе быў прыняты Дэкрэт №226, які яшчэ больш узмацніў ідэнтыфікацыю гульцоў і забараніў прыёмы плацяжоў на карысць замежных аператараў, банкі ўвогуле не павінны праводзіць такія транзакцыі. Рэклама павінна быць звязаныя з ліцэнзаванымі ў Беларусі аператарамі, і да яе ёсць строгія патрабаванні. З казіно, якія рэкламуе Белавусаў, афіцыйна зарэгістраваная ў Беларусі толькі «Бетэра».

Нелегальныя анлайн-казіно ў сваю чаргу прыдумляюць абыходныя шляхі, як абыходзіць забарону на плацяжы і забіраць грошы беларусаў.

Белавусаў у сваім канале паказвае грошы. «Адкуль у мяне грошы? Я ведаю, што казік зло, але як мяркуеце, ці маю я шанцы падняць?:)», — каментуе ён.

Пакуль публічна невядомыя выпадкі, каб беларусаў праследавалі за такую рэкламу, акрамя Mellstroy, які хаваецца за мяжой.

Каментары да артыкула