Šeryja schiemy, strymy kazino i adpačynak u Dubai. Voś jak žyvie i na čym zarablaje tyktokier Uład Biełavusaŭ

Uład Biełavusaŭ (Belousov10) — tyktokier-miljońnik. U 2023‑m HUBAZiK zatrymlivaŭ jaho razam z bratam i staviŭ na kaleni za ŭdzieł u pratestach u 2020-m. Ciapier ža chłopiec tranśluje zamožnaje žyćcio, biaskoncyja padarožžy i adpačynak. Ale zarablaje jon sumnieŭnymi sposabami — raskazvajem, jakimi mienavita.

Uład Biełavusaŭ. Fota ź jahonaha instahrama, apracavanaje niejrasietkaj

Uładu Biełavusavu 29 hadoŭ. Jon rodam z Oršy. Ź dziacinstva chłopiec zajmaŭsia lohkaj atletykaj, ale paśla pačaŭ hulać u chakiej na travie. I hetaje chobi stała prafiesijaj.

Spačatku jon dva hady hulaŭ za kłub «Homiel», a paśla — za «Minsk». Ciapier užo skončyŭ spartovuju karjeru.

Fota: instahram Biełavusava

Uład ź siamji spartoŭcaŭ — jaho pačynała treniravać maci, prafiesijnaja trenierka pa chakiei na travie. Jahony brat Andrej Biełavusaŭ — taksama papularny tyktokier i hulec.

Charyzmatyčny spartoviec pačaŭ vieści tyktok piać hadoŭ tamu. Pa pryznańni chłopca, heta jašče i dapamahaje papularyzavać ulublony sport — na matčy CHK «Minsk» pačali prychodzić jaho padpisčyki. 

Padčas hulni. Biełavusaŭ — krajni źleva. Fota ź jahonaj staronki Ukantakcie

Uład zdymaje zvyčajny tyktokavy kantent, u jaho ciapier bolš za 2,5 miljona padpisčykaŭ u tyktoku i jašče amal 900 tysiač čałaviek u instahramie.

A ŭ 2022‑m chłopca zatrymali hubazikaŭcy. Uład udzielničaŭ u pratestach u Minsku razam z bratam Andrejem, jakoha taksama zatrymali. Jany abyšlisia sutkami.

Ale vialikich hrošaŭ na tyktoku nie zarobiš — a Uładu, vidać, vielmi chaciełasia. Spakusa lohkich hrošaŭ zakruciła chłopcu hałavu, i jon palez u šeryja sposaby zarobku.

Ad mutnych schiem da adkrytaha skamu

U lipieni 2021 hoda Biełavusaŭ adkryŭ prajekt Belousov Crypto. Tam jon raspaviadaje, jak sprabuje zarabić na kryptavalutach. Tady chłopiec zarablaŭ sam i davaŭ refieralnyja spasyłki na płatformy, na jakich aktyŭničaŭ.

Jaho paprakali ŭ tym, što jon «pampiŭ» kryptamaniety, jakija paśla pradavaŭ z vyhadaj dla siabie, a jahonyja padpisčyki zastavalisia ni z čym. Pravieryć heta ciažka, ale takaja schiema isnuje — papularny błohier zaklikaje kuplać kryptavalutu, taja padymajecca ŭ canie, i jon pradaje jaje na piku. Astatnija pradajuć jaje pa mienšym košcie, a niekatoryja zastajucca ni z čym.

Adzin ź niehatyŭnych vodhukaŭ na prajekt Biełavusava

Mutny prajekt, u jaki ŭlez Biełavusaŭ — rekłama anłajn-hulni Rakietka, jakuju jon pijaryŭ na pačatku 2023 hoda. Heta machlarskaja hulnia kštałtu kazino. Błohiery kažuć, što nibyta viedajuć, jak jaje padmanuć i dzielacca niejkimi stratehijami, choć nasamreč hulnia pracuje całkam na baku servisa i stvoranaja tak, kab tam prajhravali hrošy.

Biełavusaŭ chvaliŭsia, što zarablaje tam hrošy i zaprašaŭ tudy ludziej pa refieralnaj spasyłcy. Nasamreč hrošy jamu, chutčej za ŭsio, išli ad taho, što prajhravali jahonyja padpisčyki.

Rekłama Rakietki na kanale ŭ Biełavusava pad nazvaj Belousov Rocket

Arbitraž trafika i padzieńnie na dno

U mai 2023 jon zaniaŭsia arbitražam trafika i pryciahvaŭ šmat ludziej na svoj novy telehram-kanał. Spačatku jon zarablaŭ na tym, što hnaŭ trafik sam. Paśla jon zapuściŭ kurs pa arbitražy.

Paralelna Biełavusaŭ pačaŭ pakazvać svajo pryhožaje žyćcio. Cełymi dniami — tusoŭki, vandroŭki ŭ Dubaj i Jeŭrasajuz, darahija mašyny i pryhožyja žančyny. Paralelna pakazvaŭ, što kupiŭ maci kvateru, a bratu mašynu.

Biełavusaŭ u Maskvie. Fota ź jahonaha telehram-kanała

Biełavusaŭ davaŭ miesiedž padpisčykam — maŭlaŭ, idzicie da nas vučycca i budziecie žyć tak ža, vyciahniecie siamju z halečy. U arbitražy trafiku sapraŭdy možna dobra zarabić. Ale jość niuansy.

Uvohule, u arbitražu trafika ničoha drennaha niama. Heta prosta pryciahnieńnie trafika na resurs z dapamohaj rekłamy. Šmat tut nie zarobiš, kali ty nie kruty ekśpiert.

Kursy Biełavusava, kali mierkavać pa jahonym kanale, vučać u asnoŭnym tamu, jak zarablać na tak zvanym šerym arbitražy. Ideja ŭ tym, kab padmanuć rekłamnyja płatformy (Google Ads, Facebook, TikTok, kantekst, push‑sietki) i zmusić ich rekłamavać toje, što tam rekłamavać zabaroniena.

Uład Biełavusaŭ pakazvaje pryhožaje žyćcio dla svaich padpisčykaŭ

U akaŭncie, jaki ŭkazany jak kantaktny, nam raskazali pra kirunki, pa jakich pracuje prajekt Biełavusava:

• Hemblinh. Heta kazino i inšyja azartnyja hulni.
• Nutra. Heta bijadabaŭki i kaśmietyka, jakija časta pradajucca pa zavyšanych cenach, a ichnija jakaści vydumanyja.
• Dejtynh. Zvyčajna ŭ takich vypadkach heta značyć — servisy dla seks-znajomstvaŭ, častka ź jakich skamierskija.
• Betynh. Staŭki na sport, u tym liku ŭ nielehalnych bukmiekierskich kantorach.
• e‑commerce. Pad hetaj abstrakcyjaj moža chavacca što zaŭhodna.
• Trafik na mabilnyja prahramy. Časta — taksama kazino i inšyja azartnyja hulni.

Adkaz ad słužby padtrymki kursa Biełavusava

Z hetych kirunkaŭ całkam bieły — tolki e‑commerce. Praŭda, u svaim kanale Biełavusaŭ nie publikuje skrynšotaŭ z rekłamy ničoha, akramia kazino. U kursie jon prapanuje tym, chto kupić kurs, zahatoŭki tak zvanych kreatyvaŭ — hatovych baneraŭ pad rekłamu azartnych hulniaŭ.

Prapanova ad Biełavusava ŭ jahonym kanale

Šeryja arbitražniki paźbiahajuć adkaznaści tym, što amal nikoli nie žyvuć u tych krainach, pa jakich pracujuć. Žyvučy ŭ Biełarusi, Rasii ci Emiratach jany «zalivajuć» trafik na ZŠA, Łacinskuju Amieryku ci Jeŭrasajuz. Schapić takich arbitražnikaŭ davoli ciažka — jany vykarystoŭvajuć składanuju sistemu paźbiahańnia identyfikacyi, karystajucca kryptavalutami, sietkami proksi i rehistrujuć šmat jakija akaŭnty na padstaŭnych asobaŭ («dropaŭ»).

Adzin z šerych arbitražnikaŭ, jaki pracuje z Hruzii, raskazaŭ «Našaj Nivie», što na šerym arbitražy, kali pracavać na siabie i nie pierachodzić u zusim kryminał kštałtu kramaŭ narkotykaŭ, možna zarablać ad $5 tysiač na miesiac, kali paščaścić i kali nadzialać hetamu paŭnavartasnyja vosiem hadzin na dzień.

Prybytak vyvodzicca ŭ kryptavaluty, a paśla — u najaŭnyja. Pry patrebie «adbialić» dachod heta robicca praź IP u Hruzii ci ŭ inšych krainach, u jakich padatkovyja mała cikaviacca realnaj krynicaj dachodaŭ.

Sam Uład rekłamuje anłajn-kazino. U hetym vypadku jon zarablaje na tym, što čałaviek rehistrujecca i ŭnosić depazit.

Na ŭsich skrynšotach u jahonym kanale — skrynšoty Ruletki na ispanskaj, anhlijskaj i inšaj movach

Kaštujuć kursy ad $620 za taryf «Usio sam» da $1110 za taryf VIP. Kursy robiacca praź biełaruskaje IP Biełavusava. Składu trenieraŭ na sajcie niama, jak niama i dokazaŭ realnaj efiektyŭnaści kursa.

Rascenki na kursy Biełavusava na jahonym sajcie ŭ rasijskich rublach

Pytańni jość da zahadkavaha kryptabota K2 Invest, jakoha rekłamavaŭ Biełavusaŭ. Schiema takaja — rehistruješsia na biržy, padklučaješ za hrošy tajamničaha bota i jon raskazvaje tabie, jak handlavać.

Nijakich niezaležnych vodhukaŭ na hety bot i prajekt niama. Nieviadomyja i aŭtary prajekta, jakija pradstaŭlajucca topavymi trejderami, a bot nie vypuskaje abiacanyja spravazdačy pra prybytkovaść. Ahułam heta vyhladaje jak padman.

Biełavusaŭ pijaryŭ jaho z kastryčnika 2024 hoda i da krasavika 2025‑ha. 

Adno z paviedamleńniaŭ Biełavusava pra kryptabot

Adkryty skam — rekłama kazino na strymach Kick

U vieraśni 2025‑ha Biełavusaŭ pačaŭ adkryta zarablać na strymach na płatformie Kick. Heta stryminhavy siervis kštałtu Twitch, ale afilavany z anłajn-kazino i inšymi niezakonnymi hemblinhavymi płatformami. Na joj strymić i skandalny błohier Mellstroy.

Anons śviežaha stryma Biełavusava na płatformie Kick

Biełavusaŭ na strymach niešta hladzić, a paralelna rekłamuje nielehalnyja anłajn-kazino. Jon raskazvaje pra kazino jak zabavu i jak sposab zarabić, raskazvaje pra svaje niejmaviernyja vyjhryšy.

U rečaisnaści błohiery atrymlivajuć pracent ad prajhranych padpisčykami hrošaj, i heta samy vyhadny šlach partniorstva z anłajn-kazino. Błohieru moža dastavacca da 50-70% prajhranych hrošaj.

Takaja rekłama nakiravanaja na zaležnych ad hemblinhu i ŭraźlivych ludziej, jakija prajhrajuć tam vielizarnyja hrošy, časta załaziačy ŭ kredyty i pradajučy siamiejnyja rečy. U Biełarusi takaja rekłama całkam zabaronienaja.

Spačatku Biełavusaŭ rekłamavaŭ kazino Arcada. Voś anons i refieralnaja spasyłka Biełavusava ŭ jahonym kanale.

Rekłama kazino Arcada u kanale Biełavusava

A voś adzin z typovych vodhukaŭ na hetaje kazino.

Vodhuk na kazino Arcada

Dalej jon pierajšoŭ na rekłamu kazino Martin. Heta jašče adno nielehalnaje kazino z sumnieŭnym rejtynham.

Rekłama kazino Martin u kanale 

U Biełarusi azartnyja anłajn‑hulni lehalizavanyja, ale vielmi stroha rehulujucca. U 2025 hodzie byŭ pryniaty Dekret №226, jaki jašče bolš uzmacniŭ identyfikacyju hulcoŭ i zabaraniŭ pryjomy płaciažoŭ na karyść zamiežnych apierataraŭ, banki ŭvohule nie pavinny pravodzić takija tranzakcyi. Rekłama pavinna być źviazanyja ź licenzavanymi ŭ Biełarusi apieratarami, i da jaje jość strohija patrabavańni. Z kazino, jakija rekłamuje Biełavusaŭ, aficyjna zarehistravanaja ŭ Biełarusi tolki «Bietera».

Nielehalnyja anłajn-kazino ŭ svaju čarhu prydumlajuć abychodnyja šlachi, jak abychodzić zabaronu na płaciažy i zabirać hrošy biełarusaŭ.

Biełavusaŭ u svaim kanale pakazvaje hrošy. «Adkul u mianie hrošy? Ja viedaju, što kazik zło, ale jak miarkujecie, ci maju ja šancy padniać?:)», — kamientuje jon.

Pakul publična nieviadomyja vypadki, kab biełarusaŭ praśledavali za takuju rekłamu, akramia Mellstroy, jaki chavajecca za miažoj.

Kamientary da artykuła