У Францыі парламент выказаў недавер ураду
Пасля таго, як Нацыянальны сход выказаў вотум недаверу прэм’ер-міністру Франсуа Байру, ягоны ўрад будзе вымушаны пайсці ў адстаўку. Гэта ўжо чацвёртая змена кабінета міністраў у краіне за апошнія два гады.
Франсуа Байру. Фота: Ameer Alhalbi/Getty Images
Байру прабыў на сваёй пасадзе ўсяго дзевяць месяцаў. Ён сам ініцыяваў працэс галасавання, калі стаў цэнтрам крызісу, выкліканага яго эканамічнай праграмай.
Прэм’ер прапаноўваў маштабны план жорсткай эканоміі: скараціць дзяржаўныя выдаткі прыкладна на 44 мільярды еўра, замарозіць падатковыя стаўкі, а таксама пакінуць на наяўным узроўні пенсіі і сацыяльныя выплаты. Мэта гэтага, паводле Байру, — знізіць дзяржаўны доўг і збалансаваць бюджэт.
Аднак яго ініцыятывы выклікалі супраціў як у парламенце, так і ў грамадстве. Сітуацыя перарасла ў палітычны крызіс, і Байру вырашыў вынесці пытанне даверу на галасаванне, якое завяршылася для яго паразай.
З моманту абрання Эммануэля Макрона ў 2017 годзе гэта ўжо шосты прэм’ер-міністр. Асабліва частыя змены кіраўнікоў урада адбываюцца пасля 2022 года — Байру стаў ужо пятым па ліку за гэты час. Гэта сведчыць пра нестабільнасць французскай выканаўчай улады.
Чытайце таксама:
Францыя стаіць на парозе новага палітычнага крызісу
Тандэм прэзідэнта Францыі і яго прэм'ер-міністра стаў самым непапулярным у сучаснай гісторыі краіны
Макрон аб'явіў пра гатоўнасць 26 краін накіраваць свае войскі ва Украіну