У камітэта па здароўі Мінска з'явіўся новы кіраўнік. Папярэдняга затрымалі, але ўлады пра гэта маўчаць
Ігара Юркевіча замяніў былы першы намеснік міністра аховы здароўя Юрый Горбіч. Але пра звальненне папярэдняга кіраўніка камітэта афіцыйна не паведамлялася. Ён нібыта растварыўся.
Юрый Горбіч. Фота: «Мінск-Навіны»
Былы першы намеснік міністра аховы здароўя Юрый Горбіч узначаліў камітэт па ахове здароўя Мінгарвыканкама. Сёння яго прадставілі работнікам камітэта.
Цікава, што ў паведамленні «Мінск-Навіны» пра прызначэнне Горбіча няма ні слова пра ягонага папярэдніка Ігара Юркевіча, пра звальненне якога ніхто не паведамляў. У артыкуле ўвогуле няма інфармацыі пра тое, хто ўзначальваў камітэт перад Горбічам. Ёсць толькі актыўная спасылка на старую навіну пра прызначэнне Юркевіча кіраўніком камітэта.
«Наша Ніва» пісала, што Юркевіча затрымалі ў канцы мая. Яго арыштавалі пры атрыманні хабару і адправілі ў СІЗА. Пры гэтым ні сілавікі, ні чыноўнікі пра справу супраць высокапастаўленага чыноўніка не паведамлялі.
Ігар Юркевіч. Фота: Minsknews.by
Юркевіч лічыўся перспектыўным чыноўнікам, многія ў галіне бачылі яго будучым міністрам аховы здароўя. Але кар'ерны ўзлёт перапыніла сакрэтная карупцыйная справа.
Чытайце таксама:
Арыштаваны чыноўнік, які мог стаць наступным міністрам аховы здароўя