«Яблычкі па 11 рублёў». Цэны ў краме шакавалі жыхарку Жодзіна
Да свята Яблычнага Спаса жыхарка Жодзіна вырашыла праверыць, колькі каштуюць яблыкі ў жніўні, і зняла відэа для тыктока. Цэны яе шакавалі, піша Ex-press.live.
Фота ілюстрацыйнае
«Яблычны Cпас. Зараз зайду, хачу ў краме паглядзець, ці ёсць усё ж такі яблыкі. Прыйшла ў краму «Грын» і ачмурэла ад цэн. 8 рублёў, 7.99, 8.59, 10.68, 10.88. Ну і ну. 11.49! Яблыкі зялёныя. Ну, гэта ж стары ўраджай. 8.79 — сацыяльна значны тавар. Нічога сабе. Пры гэтым вось бананы, якія за акіян прыехалі, каштуюць 4.69», — расказвае жанчына.
Атрымліваецца, што ў Жодзіне кілаграм яблыкаў каштуе 8-11 рублёў, тады як бананы амаль удвая таннейшыя.
Прынцыповай змены сітуацыі чакаць наўрад ці варта. Сёлета ўраджай яблыкаў у Беларусі скараціўся амаль утрая. Так, старшыня Брэсцкага аблвыканкама Пятро Пархомчык паведаміў, што сёлета чакаецца толькі 37—40 тысяч тон замест каля 120 тысяч тон у мінулым годзе. Такога аб’ёму хопіць для ўнутранага рынку, але экспарт амаль спыніцца.
У той жа час у Польшчы сітуацыя супрацьлеглая: ураджай у 2025 годзе павялічыцца прыкладна на 6%. Сады ацэньваюцца як добрыя, асноўныя сарты захавалі стабільную прадуктыўнасць. Польскія фермеры ўжо рыхтуюцца да экспарту і ўмацоўваюць свае пазіцыі на еўрапейскім рынку.
Чытайце таксама:
Пархомчык ацаніў страты яблык пры вясенніх замаразках
Адным перад суседзямі сорамна, другія радуюцца кавунам памерам з персік. Беларусы паказваюць ураджай