У Беларусі паведамілі пра стварэнне комплексу для прагназавання атак дронаў

АЛС «Сканер» заяўляецца як распрацаваны беларускай кампаніяй ІннаТэх Солюшнс комплекс для выяўлення і прагназавання атак беспілотнікаў. Ён прызначаны для аховы аб’ектаў ад нізкалётных БПЛА, у тым ліку тых, што працуюць у рэжыме «радыёмаўчання», паведамляе прэс-служба Дзяржкамваенпрама.

Сістэма, як паведамляецца, працуе ў пасіўным рэжыме, выкарыстоўваючы акустычныя датчыкі, якія фіксуюць гук вінтоў або рухавікоў дрона. Атрыманая інфармацыя апрацоўваецца праграмным забеспячэннем, якое вызначае хуткасць, курс, становішча ў прасторы і прагназуе далейшы рух апарата.

Склад комплексу:

• датчыкі гуку (колькасць залежыць ад канфігурацыі аб’екта);
• пункт кіравання з серверам і планшэтам для візуалізацыі і кіравання;
• праграмнае забеспячэнне для апрацоўкі сігналаў і кіравання сістэмай;
• каналы сувязі паміж датчыкамі і пунктам кіравання;акумулятары для аўтаномнай працы;
• навігацыйнае абсталяванне для дакладнага пазіцыянавання.

Асаблівасцямі комплексу называюцца такія:

• працуе кругласутачна і ў складаных умовах надвор’я;
• не выдае сябе актыўным выпраменьваннем;
• падтрымлівае розныя фарматы картаў;
• бачыць дроны з рухавікамі ўнутранага згарання на адлегласці да 1 км;
• мае высокую дакладнасць вызначэння хуткасці і курсу;
• можа працаваць аўтаномна або ў складзе іншых сістэм бяспекі;
• перадае даныя па абароненых каналах (валаконна-аптычныя або радыё).

Заяўляецца, што «Сканер» з’яўляецца эфектыўным сродкам пасіўнага кантролю і прагназавання дзеянняў БПЛА, што дазваляе павысіць бяспеку стратэгічных аб’ектаў.

Каментары да артыкула