Беларусы ставяць адну зорку дзіцячаму цэнтру, які трапіў у скандал з беларускай мовай
Дырэктарка дзіцячага цэнтра «Сокровища нации» цяпер просіць бацькоў дапамагчы падняць рэйтынг у «Яндэксе».
Драма вакол цэнтра дзіцячага развіцця «Сокровища нации» не сціхае. У сторыс афіцыйнага акаўнта з’явіўся скрыншот водгукаў на «Яндэкс. Картах»: два чалавекі напісалі негатыўныя каментарыі наконт моўнай дыскрымінацыі. Іншыя проста ацанілі паставілі адзнаку цэнтру, і яго рэйтынг цяпер — роўна 1,0.
Таму кіраўніцтва просіць бацькоў дапамагчы выправіць сітуацыю і пакінуць станоўчы водгук. Пакуль наведвальнікі ратаваць рэпутацыю «Сокровища нации» не спяшаюцца.
Нагадаем: на мінулым тыдні беларускамоўная выкладчыца паскардзілася ў сацсетках, што яе не ўзялі на працу ў «Сокровища нации» праз тое, што ў цэнтры ўсе размаўляюць выключна на рускай мове.
Дырэктарка Людміла Жук потым некалькі разоў спрабавала растлумачыць сітуацыю. То яна казала, што ўжо думала нават стварыць беларускамоўны гурток, але пасля пачатку скандалу ў сацыяльных сетках раздумала. То казала, што дазволіла б выкладчыцы вітацца і развітвацца з бацькамі на беларускай, але ўвесь час размаўляць — гэта, па яе меркаванні, перабор.
Чыноўнікі паспрабавалі хутка адрэагаваць на скандал. Намесніца кіраўніка адміністрацыі Цэнтральнага раёна сталіцы Людміла Барысенка расказала журналісту «Мінск-Навінаў», быццам у цэнтр прыйшла праверка і знайшла парушэнні:
— Маніторынг цэнтра з боку Дэпартамента якасці адукацыі Міністэрства адукацыі выявіў парушэнні заканадаўства, звязаныя з арганізацыяй адукацыйнага працэсу і бяспекай. Прадпрыемства не ўзгадніла ва ўстаноўленым парадку праграмы дадатковай адукацыі дзяцей і моладзі. Выпраўленне парушэнняў знаходзіцца на кантролі ўпраўлення па адукацыі адміністрацыі Цэнтральнага раёна Мінска.
Людміла Жук. Скрыншот яе сторыс у інстаграме
Але ж сама дырэктарка «Сокровищ нации» абвінаваціла і дзяржаўнага журналіста, і чыноўніцу ў хлусні. Яна распавяла ў сторыс, што ніякіх праверак пасля інцыдэнту не было.
Людміла Жук таксама заявіла, што напісала заяву ў міліцыю на беларускамоўную выкладчыцу, якая паскардзілася на яе цэнтр у сацсетках.