Хто тыя людзі, якімі запоўнілі Нацыянальны футбольны стадыён пры яго адкрыцці?

У Мінску 7 чэрвеня з помпай адкрывалі Нацыянальны футбольны стадыён, які Аляксандр Лукашэнка ў сваім выступе прадставіў як падарунак ад Кітая. Пасля ягонай прамовы прайшоў футбольны матч паміж моладзевымі зборнымі Беларусі і Кітая, пры гэтым трыбуны, якія месцяць 33 тысячы гледачоў, былі запоўненыя. За кошт чаго, даведаўся «Флагшток».

Фота: «Хойніцкія навіны»

Аказалася, што масоўку на адкрыццё звозілі з усёй краіны — нават з самых аддаленых куткоў.

Каб забяспечыць запоўненасць трыбун, у Мінск традыцыйна накіравалі чыноўнікаў і работнікаў бюджэтных арганізацый.

Дэлегацыя з Хойніцкага раёна. Фота: «Хойніцкія навіны»

Напрыклад, з Гомеля прывезлі не толькі ідэолагаў аблвыканкама, работнікаў прадпрыемстваў, але і бюджэтнікаў з раёнаў — нават такіх аддаленых як Ельскі, Хойніцкі, Брагінскі і іншыя.

Дэлегацыю, напрыклад, з Ельска ўзначальвала старшыня раённага Савета дэпутатаў Аксана Захарчанка.

Дэлегацыя з Ельскага раёна. Фота: «Народны голас»

Флагшток высветліў, у колькі мясцовым бюджэтам абышлася дастаўка «заўзятараў» у Мінск, каб выступ Лукашэнкі прайшоў пры запоўненых трыбунах.

Рэчыцкі райвыканкам аб'яўляў тэндар на транспартныя паслугі па дастаўцы дэлегацыі ў Мінск і назад у дзень адкрыцця стадыёна коштам 2,1 тысяч рублёў. А з Хойнікаў адпраўлялі 15 чалавек, таму наймалі мікрааўтобус, заплаціўшы за гэта 1,3 тысячы рублёў.

Каментары да артыкула