Літоўскія мытнікі не далі ўвезці з Беларусі царкоўны звон

Уначы з 15 на 16 сакавіка, праз некалькі хвілін пасля поўначы, да мытнага паста ў Салечніках на аўтамабілі Mercedes Sprinter прыбыў грамадзянін Малдовы, які вусна заявіў мытнікам, што не перавозіць нічога забароненага або абавязковага для дэкларавання. Аднак пры аглядзе транспартнага сродку мытнікі выявілі нечаканую знаходку — схаваны пад мяхамі царкоўны звон.

Ніякіх дакументаў на звон кіроўца не меў і заявіў, што нават не ведаў пра іх неабходнасць. Ён прызнаўся, што перавозіў званы з расійскага горада Падольск праз Беларусь і Літву па просьбе «патрыярхаў Кірыла і Мікалая».

Цяпер спецыялісты літоўскага Дэпартамента аховы культурнай спадчыны ацэньваюць, ці не з'яўляецца гэты звон вагой 260 кг аб'ектам культурнай спадчыны. Таксама ёсць падазрэнні, што ён мог быць выкрадзены з тэрыторыі Украіны.

Згодна з надпісамі на звоне, ён, магчыма, быў адліты ў гонар святога XVII стагоддзя — мітрапаліта Кіеўскага і ўсёй Русі Пятра Магілы.