Прарасійскі палітолаг абураецца маёнткам «Сула»: Увесь персанал гаворыць выключна па-беларуску і на рускую не пераходзіць
Прарасійскі палітолаг і заходнерусіст Усевалад Шымаў наведаўся ў парк гісторыі «Сула» разам з маскоўскімі сябрамі.
Усевалад Шымаў і «Сула». Фота: блог Шымава
«У прынцыпе, убачыў я там тое, што і чакаў — такі ліцвінскі лубок з закосам пад Еўропу», — адзначае ён.
Але пры гэтым не можа не пахваліць маёнтак: вялікая тэрыторыя, шмат наведвальнікаў, хоць і цэннік высокі.
«Калі абстрагавацца ад ідэалогіі, у прынцыпе, тут сапраўды можна нядрэнна правесці час, як дзецям, так і дарослым, асабліва летам».
@nashaniva Прарасійскі палітолаг абурыўся: у «Суле» ўсе гавораць выключна па-беларуску #сула #политика #новости #беларусь ♬ Sneaky Snitch - Kevin MacLeod
«Сам парк забудаваны лубочнымі новабудоўлямі пад сярэднявечную Літву. Усярэдзіне разнастайныя тэматычныя экспазіцыі. Увесь персанал мае зносіны выключна па-беларуску і на рускую не пераходзіць, нават калі звяртаешся да іх па-руску», — незадаволены Шымаў.
Не спадабалася яму і тое, што першадрукар Іван Фёдараў ператварыўся ў Федаровіча, а персанал «апрануты ў шляхецкія касцюмы».
І нават мясцовага ката Шымаў назваў «ліцвінскім».
Усевалад Шымаў выступае за інтэграцыю з Расіяй і настроены супраць Еўропы і ЗША. Ён падзяляе ідэі заходнерусізму (заходнерусісты лічаць Беларусь не самастойнай краінай, а рэгіянальнай часткай Расіі, а саміх беларусаў — адгалінаваннем рускага этнасу). Раней лічылася, што ён вёў канал «Западнорусская Атлантида», які прыкрылі.