«Praklon załatoj kvietki»
Kalarovyja cudy ad Čžana Imoŭ
Kroŭ na zołacie, błakit i chryzantemy… Intryhi kitajskaha dvara ŭ nievierahodnym dekaracyjnym afarmleńni.
Praklon załatoj kvietki (Man cheng jin dai huang jin jia)
Kitaj, 2006, kalarovy, 114 chv.
Režyser: Čžan Imoŭ
Roli vykonvajuć: Čoŭ Juńfat, Li Hun, Džej Čoŭ, Lu Je, Ni Dachun, Ciń Cziuńdzie
Žanr: Historyka-dekaracyjny kitajski kinaraman
Adznaka: 6 (z 10)
Kitaj, X stahodździe. Imperatryca placie zmovy j spakušaje pasynka, imperatar pacichu atručvaje niaviernuju žonku, siaredni syn planuje paŭstańnie, kab abaranić maci, a małodšy syn zajzdrościć kožnamu…
Aŭtar “Hieroju” Čžan Imoŭ davioŭ kitajski śvietapohlad da lahičnych vysnovaŭ: asoba – tolki častka dekaracyjnaha afarmleńnia. Jana raściarušvajecca na karyść cełaha.
Chacie ŭ karcinie “Praklon załatoj kvietki” – zabojstvy, incest, schavanyja žarści – sami nośbity hetych žarściaŭ – pustyja. Heta ŭmoŭnyja, siaredniaviečnyja funkcyi, kali asoby – u siońniašnim jaje razumieńni – jašče nie było.
Usio padparadkoŭvajecca vykštałconaj kalarovaj dramaturhii, dzie čałaviek – tolki častka arnamentu. Čyrvonaje na załatym – pryhoža – i zalijecca kryvioju prync u załatych daśpiechach; šeryja vajary zatopčucu chryzantemy, zabliščać błakitam kaściumy achovy.
Kolery składajuć harmoniju, harmonija – zakon Pryrody, što ź niaŭchilnaj nastojlivaściu abviaščajecca ŭ imperatarskich pakojach i za śviatočnym stałom.
I što čałavieku – źmianiać zakony pryrody? Varta padparadkavacca im, jakimi aŭtarytarnymi jany nie byli b.
Najdzivośniejšaje ŭ svajoj pieknacie nieeŭrapiejskaje kino.
Seansy ŭ “Domie kino” ŭ subotu j niadzielu a 17, 19 i 21.00. Stužka na aryhinalnaj movie z subtytrami.
Film demanstrujecca ŭ miežach prahramy kitajskaha kino.