U Armienii adkryvajecca dziciačaje «Jeŭrabačańnie»

Biełaruskija pradstaŭlaje Lidu Zabłockuju.

Siońnia ŭ Jerevanie adkryvajecca mižnarodny dziciačy piesienny konkurs «Jeŭrabačańnie-2011».

Tradycyjny Jeŭratydzień pačniecca śviatočnaj viečarynkaj adkryćcia, a pakul u stalicu Armienii źjazdžajucca delehacyi z 13 krain, hetaj nočču prybyła i biełaruskaja kamanda. U minskim aeraporcie Lidu Zabłockuju i jaje hrupu pravodzili žurnalisty. Dzieci demanstravali ŭsim promapradukcyju — suvieniry ŭ vyhladzie aniołkaŭ i pano «Anioł dabra. Biełaruś — Jeŭrabačańnie-2011». Udzielniki dziciačaha «Jeŭrabačańnia» ad Biełarusi apranuty ŭ kamizelki i kurtki ź firmiennaj simvolikaj, jakija śpiecyjalna dla artystaŭ raspracavali madeljery.

Pierad adjezdam Lida pryznałasia, što rada pradstaŭlać krainu na prestyžnym piesiennym konkursie, pasprabuje vystupić jak maha lepš, kab padaryć hledačam dobry nastroj. Jana raźličvaje tut znajści novych siabroŭ, paznajomicca z krainaj.

Napieradzie kankursantaŭ čakaje nialohki tydzień, raskład vielmi ščylny. Akramia repietycyj, u im jość niamała zabaŭlalnych mierapryjemstvaŭ: viečarynki, ekskursii. U bližejšyja dni junyja vykanaŭcy aprabujuć scenu spartyŭna-kancertnaha kompleksu imia Karena Demirčana, a ŭ piatnicu projduć dva hienieralnyja prahony finalnaha šou, pryčym apošni ź ich budzie aceńvać žury. Jašče adna hienieralnaja repietycyja namiečana na ranicu 3 śniežnia, a viečaram adbudziecca finalny kancert, i jeŭrapiejski hladač vyznačyć samuju lepšuju dziciačuju pieśniu 2011 hoda.

U dziciačym «Jeŭrabačańni» ŭ Jerevanie prymuć udzieł kankursanty z 13 krain — Rasii, Hruzii, Ukrainy, Łatvii, Armienii, Litvy, Biełarusi, Makiedonii, Bielhii, Niderłandaŭ, Šviecyi, Bałharyi i Małdovy. Muzyčny konkurs «Jeŭrabačańnie» siarod dziaciej ad 10 da 15 hadoŭ pravodzicca z 2003 hoda. Miesca jaho praviadzieńnia štohod vyznačaje arhkamitet, heta značyć kraina-pieramožca nie atrymlivaje aŭtamatyčnaha prava na arhanizacyju mierapryjemstva ŭ nastupnym hodzie.

Kamientary da artykuła