Biełaruskija navukoŭcy raspracoŭvajuć «vakcynu biasstrašnaści» dla spartsmienaŭ i vajskoŭcaŭ
U asnovie mietodyki — uviadzieńnie na ślizistuju abałonku nosa endataksinaŭ.
Pra heta paviedamiŭ namieśnik dyrektara pa navukovaj rabocie Instytuta fizijałohii Akademii navuk prafiesar Uładzimir Kulčycki.
U asnovie mietodyki — uviadzieńnie na ślizistuju abałonku nosa endataksinaŭ — frahmientaŭ ścienki kišačnaj pałački, jakaja ŭtrymlivajecca ŭ stravavalnym trakcie kožnaha čałavieka i važnaja dla aktyvacyi imunnaj sistemy. Padčas ekśpierymientaŭ na žyviole fizijołahi zaŭvažyli, što navat nievialikija kolkaści endataksinaŭ pry traplańni ŭ nosa vyklikajuć źmianieńnie pavodzin. «Da prykładu, pacuki i myšy pierastavali chavacca ŭ norach i advažna pieramiaščalisia pa adkrytaj prastory, što nie charakterna dla ich u zvyčajnaj situacyi», — raspavioŭ Uładzimir Kulčycki.
U budučyni
vyniki hetych daśledavańniaŭ mohuć stać asnovaj dla raspracoŭki svojeasablivaj «vakcyny biasstrašnaści» dla spartoŭcaŭ, a taksama vajskoŭcaŭ.Takaja vakcyna moža stać papularnaj i siarod studentaŭ, jakija zdajuć ispyty, upeŭnieny navukoŭcy.
«Nievialikaja aplikacyja na ślizistuju abałonku nosa pierad spartovymi spabornictvami abo inšymi chvalujučymi padziejami dapamoža zdabyć upeŭnienaść u svaich siłach i nastroicca na pieramohu, — adznačyŭ surazmoŭca. — Nieabchodna tolki dazavanaje ŭviadzieńnie aprabavanych i biaśpiečnych substancyj. Pry pravilnym padychodzie jany absalutna biaśpiečnyja dla zdaroŭja i nie pavinny stać u šerah dopinhavych srodkaŭ».
Navukoŭcy praciahvajuć daśledavańni ŭ hetaj halinie. Nie vyklučana, što prajekt budzie pašyrany, i ekśpierty šlacham uviadzieńnia asobnych substancyj praź ślizistuju abałonku nosa prapanujuć novyja šlachi baraćby ź psichičnymi rasstrojstvami i zachvorvańniami.
U Instytucie fizijałohii NAN Biełarusi raspracoŭvajuć sučasnyja bijapreparaty, technałohii padaŭleńnia rostu puchlinavych kletak, mietodyki prymianieńnia fizijaterapieŭtyčnych faktaraŭ, aparaty dla pavieličeńnia kolkaści stvałavych kletak. U navukovaj ustanovie pravodziać taksama daśledavańni ŭ halinie elektronnaj i śvietłavoj mikraskapii, ekśpierymientalnaj i kliničnaj niejrafizijałohii.