Biznesmien Varabiej zapeŭniŭ, što Łukašenka pieradaje jamu ziamlu nie zadarma

Biełaruski biznesmien Mikałaj Varabiej, jakomu Łukašenka 15 kastryčnika prapanavaŭ pieradać ziemli ŭ Vierchniadźvinskim rajonie, zajaviŭ, što heta nibyta robicca nie za prosta tak, piša BiełTA.

Mikałaj Varabiej. Fota: BiełTA

Jak śćviardžaje Varabiej, kali dziaržava vydzialaje dla biznes-prajektaŭ ziamlu abo inšyja abjekty, havorka nie pavinna iści pra ich biaspłatnuju pieradaču. Jon zapeŭniŭ, što hatovy apłacić usio, što budzie naležać dziaržavie za sielskahaspadarčyja ŭhodździ i pradpryjemstvy.

«Ja nie chacieŭ by niešta brać u dziaržavy. Jak biznesmien liču, što dziaržavie treba davać. I kožny biznesmien pavinien być karysnym dziaržavie i hramadstvu. Tady heta pravilny i dobry biznesmien», — zajaviŭ jon.

Varabiej raskazaŭ, što ŭžo praciahły čas pracuje ŭ Vierchniadźvinskim rajonie. Spačatku asnoŭnuju ŭvahu jon nadavaŭ raźvićciu palaŭničaj haspadarki. Pa jaho słovach, tam udałosia stvaryć pryvabnyja ŭmovy dla palavańnia i rybałki. Ciapier ža jon maje namier i dalej raźvivać rehijon.

Siarod novych napramkaŭ — sielskahaspadarčy prajekt «Čyrvony Bor Ahra», jaki śpiecyjalizujecca na raźviadzieńni bujnoj rahataj žyvioły miasnych parod. 15 kastryčnika hety kompleks naviedaŭ Alaksandr Łukašenka. Padčas vizitu abmiarkoŭvali pašyreńnie vytvorčaści i vydzialeńnie dadatkovych ziamiel.

Varabiej paviedamiŭ, što budaŭnictva adnaho małočnatavarnaha kompleksu ŭžo pačałosia, a ŭźviadzieńnie druhoha płanujecca raspačać viasnoj. Nadalej biznesmien maje namier raźvivać plemiannuju žyviołahadoŭlu i praciahvać inviestavać u rehijon.

Jon taksama zajaviŭ pra hatoŭnaść układvać srodki nie tolki ŭ vytvorčaść, ale i ŭ sacyjalnuju infrastrukturu. Pavodle jaho, raźvićcio pradpryjemstvaŭ pavinna stvarać pracoŭnyja miescy, zabiaśpiečvać zarobki i palapšać umovy žyćcia miascovych žycharoŭ. U rajonie, maŭlaŭ, užo pabudavali darohi i miescy dla adpačynku, a ŭ vioskach pracujuć kaviarni.

Kamientary da artykuła