Pad ciskam hramadskaści Tramp admianiŭ žyvuju tranślacyju rasstrełu złačyncy, asudžanaha da śmiarotnaha pakarańnia

Donald Tramp 15 kastryčnika zajaviŭ, što pakarańnie śmierciu Nidala Chasana, asudžanaha za stralaninu na amierykanskaj vajskovaj bazie Fort-Hud u 2009 hodzie, nie buduć tranślavać u žyvym efiry. Takim čynam, prezident ZŠA admianiŭ rašeńnie Pientahona, abvieščanaje tydniem raniej, paviedamlaje CNN.

Nidal Chasan. Fota: nbcdfw.com

Rasstreł Chasana, jak i płanavałasia, pavinien adbycca 3 śniežnia. Ubačyć pakarańnie zmohuć tolki najbližejšyja svajaki zahinułych.

Tramp patłumačyŭ, što publičnaja tranślacyja mahła b prademanstravać usiamu śvietu, jak ZŠA abychodziacca z terarystami, i stać dla ich pieraściarohaj. Adnak, pa słovach amierykanskaha prezidenta, mnohija ludzi nie chacieli b bačyć śmierć Chasana ni ŭ žyvym efiry, ni ŭ inšym farmacie.

Pra namier pakazać pakarańnie ŭsim achvotnym na minułym tydni paviedamiŭ kiraŭnik Pientahona Pit Chiehsiet. Pavodle krynic CNN, Tramp nibyta zahadzia nie viedaŭ pra hetuju zajavu i spačatku nie mieŭ vyraznaj pazicyi nakont tranślacyi. Pry hetym jon, jak paviedamlajecca, rašuča padtrymlivaje samo rašeńnie pakarać Chasana śmierciu praz rasstreł. 

Admieny tranślacyi patrabavali palityki abiedźviuch viadučych partyj ZŠA i relihijnyja lidary. Napiaredadni 72 byłyja vysokapastaŭlenyja pradstaŭniki amierykanskich uzbrojenych sił, u tym liku 45 hienierałaŭ i 12 admirałaŭ, vystupili z adkrytym listom. Jany nie piarečyli suprać samoha pakarańnia śmierciu, ale nazvali publičnuju tranślacyju «varvarskim złoŭžyvańniem uładaj».

Na ich dumku, pakaz rasstrełu parušyŭ by kanstytucyjnuju zabaronu žorstkich pakarańniaŭ i moh by pieratvaryć Chasana ŭ pakutnika ŭ vačach praciŭnikaŭ ZŠA.

5 listapada 2009 hoda vajskovy psichijatr, major Nidal Chasan adkryŭ ahoń na bazie Fort-Hud u Techasie. Jon zabiŭ 13 čałaviek i paraniŭ bolš za 30. Heta byŭ samy kryvavy napad na amierykanskuju vajskovuju bazu pa-za zonaj bajavych dziejańniaŭ. Padčas suda Chasan zajaviŭ, što abaraniaŭ musulman i talibaŭ u Afhanistanie ad amierykanskich vajskoŭcaŭ. Samoha napadnika paranili, i z taho času jon pierasoŭvajecca ŭ invalidnym vazku.

U 2013 hodzie vajskovy sud prysudziŭ Chasana da śmiarotnaha pakarańnia. U pačatku kastryčnika 2026 hoda Tramp uchvaliŭ vykanańnie prysudu praz rasstreł.

Kali prysud budzie vykanany, heta stanie pieršym pakarańniem śmierciu ŭ amierykanskaj vajskovaj sistemie bolš jak za 60 hadoŭ. Apošni raz takoje pakarańnie pryviali ŭ vykanańnie ŭ 1961 hodzie: tady paviesili radavoha Džona Bienieta, asudžanaha za zhvałtavańnie 11‑hadovaj dziaŭčynki.

Kamientary da artykuła