Šlachieckuju siadzibu siaredziny XIX stahodździa z Vałožynskaha rajona pradali na aŭkcyjonie

Šlachieckuju siadzibu 1849 hoda ŭ vioscy Čechaŭščyna Vałožynskaha rajona pradali na aŭkcyjonie za 42 900 rubloŭ. Pieršapačatkova staradaŭni draŭlany dom z kałonami sprabavali pradać jašče ŭ žniŭni, ale tady kupcoŭ na jaho nie znajšłosia, piša Domovita.by.

Fota: belarus_interesting

Pierad paŭtornymi tarhami pačatkovuju canu źnizili na 50 pracentaŭ, paśla čaho na łot zarehistravalisia adrazu dva pretendenty. U vyniku tarhi 7 kastryčnika na elektronnaj placoŭcy «BUTB-Majomaść» praciahvalisia ŭsiaho 18 chvilin.

U kancy leta za kompleks prasili 71 500 rubloŭ, adnak aŭkcyjon pryznali takim, jaki nie adbyŭsia. Na vosieńskich tarhach pačatkovuju canu vyznačyli na ŭzroŭni 35 750 rubloŭ. Udzielniki zrabili čatyry staŭki i pavysili jaje ŭ 1,2 raza. Kančatkovaja cana skłała 42 900 rubloŭ, abo kala 13 956 dalaraŭ.

Fota: belarus_interesting

Kupcom staŭ pryvatny inviestar ź Minska. U skład łota ŭvajšoŭ sam draŭlany budynak płoščaj 433,7 kvadratnaha mietra, a taksama prava arendy bolš čym 50 sotak ziamli terminam na 50 hadoŭ. Pavodle pryznačeńnia ŭčastka, na im možna raźmiaščać žyłyja budynki, a taksama abjekty śfiery pasłuh i handlu.

Fota: belarus_interesting

U siadziby jość niezvyčajny jurydyčny status. Niahledziačy na jaje ŭzrost i architekturnuju kaštoŭnaść, jana nie ŭniesienaja ŭ Dziaržaŭny śpis historyka-kulturnych kaštoŭnaściaŭ. U savieckich dakumientach budynak uvohule ličyŭsia zvyčajnym haspadarčym korpusam 1957 hoda. Hetuju datu jamu prysvoili padčas paślavajennaj invientaryzacyi paśla čarhovaha kapitalnaha ramontu.

Adsutnaść achoŭnaha statusu daje novamu ŭładalniku šyrokija mahčymaści dla dalejšaha vykarystańnia terytoryi. Pavodle ŭmoŭ aŭkcyjonu, inviestar moža pravieści rekanstrukcyju budynka abo całkam jaho źnieści i na praciahu piaci hadoŭ pabudavać na ŭčastku novy abjekt. Kali ž istotna mianiać prajekt nie płanujecca, nieruchomaść treba ŭvieści ŭ ekspłuatacyju na praciahu hoda paśla zakančeńnia biahučaha ramontu.

Fota: belarus_interesting

Siadziba ŭ Čechaŭščynie ličycca redkim dla hetaj miascovaści prykładam nievialikaj šlachieckaj siadziby. Dakładna nieviadoma, chto zakazaŭ budaŭnictva doma ŭ siaredzinie XIX stahodździa, ale na adnym z kamianioŭ padmurka vyrazna paznačany 1849 hod.

Da nacyjanalizacyi ŭ 1939 hodzie siadziba naležała šlachieckamu rodu Sialankaŭ. U pačatku XX stahodździa siamji naležała kala 15 tysiač sotak ziamli, choć pavodle pierapisu 1905 hoda pastajanna ŭ majontku žyli tolki čatyry čałavieki. Apošnim zakonnym uładalnikam doma nazyvajecca Marjan Sialanka. Paśla prychodu savieckaj ułady ŭ budynku raźmiaścili škołu-internat.

Fota: belarus_interesting

Sama siadziba zachavała šerah cikavych architekturnych detalaŭ. Draŭlany zrub zvonku abšyty doškami, jakija imitujuć cahlany mur. Hałoŭny ŭvachod upryhožvaje paradny porcik z čatyrma kałonami. Na voknach zachavalisia aryhinalnyja kavanyja akanicy i zaviesy XIX stahodździa.

Fota: belarus_interesting

Pobač z domam acaleli staraja ŭjaznaja aleja i kamiennaja ladoŭnia 1855 hoda. Jana składzienaja z vałunoŭ i čornaha šłaku z vykarystańniem redkaj techniki kładki, jakuju nazyvajuć razynkavaj.

Aŭkcyjon prajšoŭ bieź vialikaha ažyjatažu, ale ciapier staradaŭniaja siadziba atrymała novaha ŭładalnika. Jaje dalejšy los budzie zaležać ad taho, jak inviestar vykarystaje svaje mahčymaści i ci zachavaje acalełyja elemienty histaryčnaj zabudovy.

Kamientary da artykuła