Pradaviec kitajskich elektramabilaŭ, jaki budavaŭ maštabnyja płany, abviaściŭ ab bankructvie
Ekanamičny sud Minska 22 vieraśnia raspačaŭ vytvorčaść pa spravie ab bankructvie TAA «7 Džy Pi». Na rynku hetaja kampanija była viadomaja pad brendam SGP i pazicyjanavała siabie jak bujnoha imparciora kitajskich elektramabilaŭ, piša Office Life.
Fota: «7 Džy Pi»
Inicyjataram bankructva vystupiŭ likvidatar tavarystva ŭ suviazi z adsutnaściu srodkaŭ dla pahašeńnia abaviazacielstvaŭ. Zapazyčanaść dasiahnuła 4,4 młn rubloŭ, pry hetym aktyvy składajuć 266 rubloŭ. Nijakaj inšaj majomaści, jak i debitorskaj zapazyčanaści, likvidatar vyjavić nie zmoh.
Ahulnaja suma kredytorskaj zapazyčanaści pavodle rejestra patrabavańniaŭ kredytoraŭ na 21 žniŭnia składała 1,68 młn rubloŭ, u tym liku 3,9 młn juaniaŭ.
Jak vynikaje z materyjałaŭ spravy, z 14 krasavika 2026 hoda adzinym udzielnikam i ŭładalnikam kampanii źjaŭlajecca Jaŭhien Vosipaŭ.
U Biełarusi SGP zajaviła pra siabie ŭ mai 2023 hoda, adkryŭšy šourum na praśpiekcie Dziaržynskaha ŭ Minsku. Kampanija śpiecyjalizavałasia na prodažy kitajskich elektramabilaŭ BYD.
Imparcior abiacaŭ stvaryć paŭnavartasnuju ekasistemu, prapanoŭvajučy klijentam dastaŭku mašyn «pad kluč» z Kitaja za 60 dzion, vyhadny lizinh i prodaž chatnich zaradnych stancyj.
Płany kampanii raspaŭsiudžvalisia i za miežy Biełarusi: kiraŭnictva SGP zajaŭlała, što ŭ 2023 hodzie budzie pastaŭlać kitajskija elektramabili ŭ Rasiju i inšyja krainy SND i ŭžo dasiahnuła z vytvorcami adpaviednych damoŭlenaściaŭ. Adnak paśla źjaŭleńnia navin u ŚMI pradstaŭniki BYD aficyjna źniapraŭdzili hetuju zajavu.