Jakija vakcyny ad hrypu dastupnyja ŭ Biełarusi i kali čakajuć pik zachvorvańniaŭ
Ludziej z hrup ryzyki biaspłatna pryščaplajuć rasijskaj vakcynaj «Hrypoł Plus». Za ŭłasnyja hrošy možna budzie vybrać zamiežnyja preparaty. Istotnaha rostu zachvorvańniaŭ miedyki čakajuć u kancy studzienia — pačatku lutaha 2027 hoda.
Fota: vecteezy.com
Kampanija masavaj vakcynacyi ad hrypu pačałasia ŭ Biełarusi ŭ kastryčniku, paviedamlajuć «Minsk-Naviny» sa spasyłkaj na epidemijołaha Kiryła Ihnatava.
Biaspłatna vakcynaj «Hrypoł Plus» rasijskaj vytvorčaści pryščaplajuć ludziej, dla jakich hryp asabliva niebiaśpiečny:
- dziaciej ad šaści miesiacaŭ da troch hadoŭ;
- dziaciej ad troch hadoŭ i darosłych z chraničnymi zachvorvańniami abo imunadeficytam;
- ludziej va ŭzroście ad 65 hadoŭ;
- ciažarnych žančyn;
- miedycynskich i farmaceŭtyčnych rabotnikaŭ;
- dziaciej i darosłych va ŭstanovach z kruhłasutačnym znachodžańniem;
- supracoŭnikaŭ dziaržaŭnych orhanaŭ, jakija zabiaśpiečvajuć biaśpieku i žyćciadziejnaść nasielnictva.
Miedyki staviać metaj — vakcynavać nie mienš za 75% ludziej z hrup ryzyki.
Dla płatnaj vakcynacyi ŭ miedycynskich ustanovach abiacajuć prapanavać «Influvak Tetra» vytvorčaści Niderłandaŭ i francuzskuju vakcynu «Vaksihryp Tetra».
Skład vakcyn na siezon 2026—2027 hadoŭ abnavili. U jaho ŭklučyli kampanienty suprać štamaŭ A(H1N1) «Misury», A(H3N2) «Darvin» i virusa hrypu B linii «Viktoryja» — «Tokia». Mienavita taki skład dla Paŭnočnaha paŭšarja rekamiendavała Suśvietnaja arhanizacyja achovy zdaroŭja.
Ciapier u Biełarusi vyjaŭlajuć tolki niehrypoznyja reśpiratornyja virusy: parahryp, rynavirusy, bakavirusy i adenavirusy. Situacyju epidemijołahi nazyvajuć stabilnaj.
Značny siezonny rost zachvorvańnia na vostryja reśpiratornyja infiekcyi prahnazujuć na kaniec studzienia — pačatak lutaha 2027 hoda. Pik čakajecca ŭ lutym, kali adnačasova mohuć cyrkulavać hryp, karanavirus SARS-CoV-2 i inšyja reśpiratornyja virusy.
Pryščepka nie harantuje, što čałaviek zusim nie zarazicca hrypam, ale źnižaje ryzyku ciažkaha chodu chvaroby i niebiaśpiečnych uskładnieńniaŭ.