Na vybarach u Bośnii i Hiercahavinie źbierahła ŭpłyŭ prarasijskaja partyja Dodzika

Na vybarach u Bośnii i Hiercahavinie zachavała značny ŭpłyŭ partyja prarasijskaha palityka Miłarada Dodzika. Jahonaja sajuźnica Želka Ćvijanavič atrymała miesca ŭ kalehijalnym prezidenctvie krainy, paviedamlaje The Guardian.

Alexandr Kryazhev/RIA Novosti/Pool/Anadolu via Getty Images

Na vybarach hramadzianie Bośnii i Hiercahaviny vybirali troch členaŭ šmatnacyjanalnaha prezidenctva, deputataŭ nacyjanalnaha parłamienta, a taksama kiraŭnikoŭ orhanaŭ ułady dźviuch składovych častak krainy — pieravažna musulmanskaj i charvackaj Fiederacyi Bośnii i Hiercahaviny i Respubliki Sierbskaj, dzie bolšaść nasielnictva składajuć etničnyja sierby.

Paśla padliku bolš jak 94% hałasoŭ u baraćbie za miesca, pryznačanaje dla charvataŭ, lidziravała Daryjana Filipavič z nacyjanalistyčnaha Charvackaha demakratyčnaha sajuza Bośnii i Hiercahaviny. Miesca dla baśnijcaŭ-musulman zachoŭvaŭ dziejny člen prezidenctva Dzianis Biečyravič z Sacyjał-demakratyčnaj partyi.

Tym časam paplečnica Dodzika Želka Ćvijanavič z pravaj partyi «Aljans niezaležnych sacyjał-demakrataŭ» atrymała bolš za 55% hałasoŭ. Jana pieramahła najbližejšaha supiernika prykładna na 30 pracentnych punktaŭ i atrymała treciaje miesca ŭ kalehijalnym prezidenctvie krainy.

Sam Miłarad Dodzik u vybarach nie ŭdzielničaŭ paśla letašniaha sudovaha rašeńnia, jakoje zabaraniła jamu bałatavacca i zajmać pasadu prezidenta Respubliki Sierbskaj. Adnak jon zastavaŭsia adnoj z centralnych fihur vybarčaj kampanii. Napiaredadni hałasavańnia Dodzik taksama zajaviŭ, što jahonaja nacyjanalistyčnaja partyja atrymaje «pieravažnuju bolšaść» u parłamiencie Respubliki Sierbskaj.

Svaju pieramohu Dodzik źviazaŭ z abrańniem Donalda Trampa prezidentam ZŠA ŭ 2024 hodzie i padtrymkaj z boku prezidenta Rasii Uładzimira Pucina. Pavodle jaho słoŭ, Tramp paśla prychodu da ŭłady «adchiliŭ nienavisnyja struktury Bajdena». Dodzik zajaviŭ, što jahonyja palityčnyja siły nie źbirajucca źmianiać svoj kurs i buduć praciahvać zmahacca za svaje intaresy.

Centralnaja vybarčaja kamisija Bośnii paviedamiła, što ŭsiaho było padadziena 1 432 269 hałasoŭ. Jaŭka skłała 42%, što prykładna na 8 pracentnych punktaŭ mienš, čym na papiarednich vybarach u 2022 hodzie.

Respublika Sierbskaja była stvoranaja ŭ 1992 hodzie jak samaabvieščanaja dziaržava paśla taho, jak Bośnija i Hiercahavina pačała praces vychadu sa składu Juhasłavii. U 1995 hodzie pavodle Dejtanskich pahadnieńniaŭ Respublika Sierbskaja stała častkaj Bośnii i Hiercahaviny.

Dodzik užo nieadnarazova demanstravaŭ svaju padtrymku rasijskamu kiraŭnictvu. U 2023 hodzie jon uznaharodziŭ Uładzimira Pucina ordenam u miežach śviatkavańnia 9 studzienia jak Dnia Respubliki Sierbskaj. 

Kamientary da artykuła