Chto toj hramadzianin Čechii, jaki pryjechaŭ u Biełaruś da chvoraj maci i byŭ aryštavany za danaty na padtrymku Ukrainy

Vital Dziamidčyk z Hrodna apošnija dvaccać hadoŭ pražyŭ u Čechii i mieŭ dva hramadzianstvy. Jamu pahražaje da dziesiaci hadoŭ kałonii.

Vital Dziamidčyk. Fota ź jahonaj staronki Ukantakcie

Vital Dziamidčyk naradziŭsia ŭ 1974 hodzie ŭ Hrodnie. Z 2006 hoda jon pastajanna žyŭ u Čechii, dzie atrymaŭ miascovaje hramadzianstva, zachavaŭšy pry hetym i biełaruski pašpart.

U Prazie Vital zajmaŭsia biznesam: ź viasny 2025 hoda jon byŭ zarehistravany jak indyvidualny pradprymalnik. Jaho dziejnaść była źviazana sa śfieraj transpartnych pieravozak, IT i arendaj žylla.

Spakojnaje žyćcio ŭ Jeŭropie pierapyniłasia, kali letam 2026 hoda Vital vyrašyŭ pajechać u Biełaruś, kab naviedać chvoruju maci. Nieŭzabavie paśla pierasiačeńnia miažy, 30 červienia, jaho zatrymali siłaviki.

Ciapier mužčyna znachodzicca ŭ minskim SIZA №1 u čakańni suda. Padstavaj dla kryminalnaha pieraśledu stali hrašovyja pieravody na padtrymku Ukrainy.

Dziamidčyku pahražaje ad piaci da dziesiaci hadoŭ kałonii sa štrafam pa artykule 361‑3 Kryminalnaha kodeksa.

Pravaabaroncy ŭžo pryznali Vitala palityčnym źniavolenym.

Na źjeździe biełarusaŭ Čechii prajšła akcyja ŭ padtrymku palitviaźnia.

Akcyja salidarnaści ź Vitalom Dziamidčykam. Fota: Ofis demakratyčnych sił Biełarusi ŭ Češskaj Respublicy

Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ. 

«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.

Kamientary da artykuła