U Biełarusi źmieniać kliničny pratakoł, datyčny atłuścieńnia

U Biełarusi rychtujuć abnaŭleńnie kliničnaha pratakołu pa dyjahnostycy i lačeńni atłuścieńnia. Dla hetaha stvaryli ekśpiertnuju hrupu, paviedamiła vydańniu «Miedicinskij viestnik» prafiesarka kafiedry endakrynałohii Biełaruskaha dziaržaŭnaha miedycynskaha ŭniviersiteta, doktarka miedycynskich navuk Ała Šepialkievič.

Zdymak ilustracyjny. Fota: magnific.com

Miedyki płanujuć adyści ad usprymańnia atłuścieńnia jak vyklučna kaśmietyčnaj prablemy abo vyniku ładu žyćcia i razhladać jaho jak surjoznaje chraničnaje zachvorvańnie.

Pavodle daśledavańnia STEPS, praviedzienaha pa mietodycy Suśvietnaj arhanizacyi achovy zdaroŭja, atłuścieńnie majuć 25,4% darosłych žycharoŭ Biełarusi, to-bok prykładna kožny čaćviorty.

U abnoŭlenym pratakole płanujuć zamacavać paniaćcie «kliničnaje atłuścieńnie». Pad im buduć razumieć chraničnaje zachvorvańnie, jakoje ŭźnikaje ŭ vyniku parušeńniaŭ funkcyj orhanaŭ abo ŭsiaho arhanizma, niepasredna źviazanych z praźmiernym nazapašvańniem tłuščavaj tkanki.

Pry dyjahnostycy buduć aceńvać nie tolki indeks masy cieła. Dadatkova płanujecca ŭličvać akružnaść talii, jaje suadnosiny z rostam i akružnaściu ściohnaŭ. U niekatorych vypadkach mohuć vykarystoŭvacca vyniki MRT, KT, densitamietryi, jakaja dazvalaje vyznačać skład cieła, a taksama bijaimpiedansnaha analizu.

Zachvorvańni i inšyja prablemy, źviazanyja z praźmiernym nazapašvańniem tłušču, prapanujecca padzialić na try asnoŭnyja hrupy: mietabaličnyja, miechaničnyja i psichałahičnyja.

Asobnym kryteryjem dyjahnostyki stanuć abmiežavańni ŭ štodzionnym žyćci. Naprykład, budzie ŭličvacca, ci ciažka čałavieku dychać, padymacca pa leśvicy abo zaviazvać šnurki.

U novym pratakole taksama płanujuć bolš padrabiazna razhledzieć biaśpieku miedykamientoznaha lačeńnia atłuścieńnia. U 2026 hodzie ŭ Biełarusi ŭpieršyniu zarehistravali preparaty dla lačeńnia atłuścieńnia na asnovie siemahłutydu. Heta rečyva dapamahaje źnižać uzrovień cukru ŭ kryvi i masu cieła. Pavodle prafiesarki Ałły Šepialkievič, preparaty na jaho asnovie majuć dobra vyvučany profil biaśpieki.

Kamientary da artykuła