«Žanočaja piŭnaja» ŭ Minsku pratrymałasia na entuzijaźmie i rasijankach tolki paŭhoda. Ciapier šukajuć inviestara
Usiaho praz paŭhoda paśla adkryćcia minskaja «Žanočaja piŭnaja» akazałasia na miažy zakryćcia. Uładalnica ŭstanovy, błohierka i pradprymalnica Alaksandra Ciamčyk paviedamiła, što ŭ najbližejšyja niekalki miesiacaŭ prajekt moža spynić pracu, kali nie znojdziecca inviestar.
Fota: instahram «Žanočaj piŭnoj»
«Žanočaja piŭnaja» adkryłasia 8 sakavika 2026 hoda. Jašče da adkryćcia i paśla jaho prajekt vyklikaŭ nieadnaznačnuju reakcyju ŭ sacyjalnych sietkach.
Pavodle Alaksandry Ciamčyk, pieršyja paŭhoda pracy byli niaroŭnymi. Amal uvieś hety čas ustanova pracavała z prybytkam, vyklučeńniem staŭ tolki vierasień. Najbolš paśpiachovym dla piŭnoj byŭ žnivień: tady pra jaje daviedalisia dziaŭčaty z Rasii, jakija i skłali bolšuju častku naviedvalnic. Adnak u vieraśni dachody źmienšylisia ŭdvaja.
Pradprymalnica padkreślivaje, što prajekt nie mieŭ nijakich źniešnich inviestycyj. Jana razam ź biznes-partniorkaj Julijaj samastojna stvaryli ŭstanovu i ŭkłali ŭ jaje ŭsie ŭłasnyja srodki.
Zaroblenyja hrošy paśla adkryćcia išli hałoŭnym čynam na pahašeńnie daŭhoŭ, jakija daviałosia ŭziać dla zapusku prajekta. Tamu nazapasić finansavuju padušku nie ŭdałosia. Pry hetym, pavodle ŭładalnicy, piŭnaja nie maje zapazyčanaści pierad pastaŭščykami i za arendu pamiaškańnia.
Kab zachavać prajekt, Ciamčyk ciapier šukaje inviestara, jaki moh by ŭkłaści hrošy i prapanavać novyja idei dla raźvićcia. Jana taksama nie vyklučaje, što «Žanočaja piŭnaja» moža atrymać praciah užo ŭ Rasii, dzie, pavodle jaje słoŭ, hetym prajektam zacikaŭlenyja. Uładalnica ŭžo atrymlivaje prapanovy nabyć franšyzu.