Rasija płanuje sieryju ŭdaraŭ pa Ukrainie, kab adrezać impart, vyvieści z ładu HES i AES
Rasijanie płanujuć vyvieści z ładu ŭkrainskuju enierhasistemu ŭ try etapy.
Fota: DSNS Ukrainy.
Rasijanie płanujuć vyvieści z ładu ŭkrainskuju enierhasistemu ŭ try etapy. Pra heta śviedčyć płan, apublikavany žurnalistami NY Times sa spasyłkaj na infarmacyju, pierachoplenuju Ukrainaj.
Pieršy — vyviadzieńnie z ładu padstancyj pablizu zachodnich miežaŭ Ukrainy, jakija impartujuć elektraenierhiju ź Jeŭropy. Druhi — vyviadzieńnie z ładu hidraelektrastancyj. Treci — adklučeńnie troch AES (Chmialnickaj, Rovienskaj i Paŭdniovaŭkrainskaj).
Usiaho Rasija płanuje vykarystać da 1000 rakiet, dronaŭ i avijabombaŭ. Siarod celaŭ — padstancyi, ciepłavyja elektrastancyi, HES, kacielni i inšyja abjekty enierhasistemy.
Kančatkovaja meta — adrezać bujnyja ŭkrainskija harady ad elektrazabieśpiačeńnia, aciapleńnia i vodazabieśpiačeńnia, što moža pryvieści da humanitarnaha kryzisu.
Jak hałoŭnyja celi vyznačanyja Kijeŭ, Charkaŭ i Adesa: praciŭnik płanuje skaracić pastaŭki elektraenierhii ŭ hetyja harady na 90%, pamienšyć pastaŭki ciapła da 90%, a taksama surjozna parušyć pracu kanalizacyjnaj sistemy.
Ale pakul niezrazumieła, ci budzie Rasija prytrymlivacca stratehii, vykładzienaj u dakumiencie, — i ci dasiahnie jana pośpiechu, kali heta zrobić.
Taksama Uładzimir Zialenski siońnia zajaviŭ, što Pucin choča prymusić ukraincaŭ pakinuć Kijeŭ.
Pra heta prezident Ukrainy Uładzimir Zialenski zajaviŭ vydańniu El País, piša RBK-Ukraina.
«Jany (rasijanie) chočuć, kab ukraincy — asabliva tyja, chto znachodzicca ŭ stalicy, — pakinuli stalicu. Nasamreč mienavita hetaha jany imknulisia dasiahnuć, kali pačynali poŭnamaštabnaje ŭvarvańnie», — adznačyŭ Zialenski.
Pavodle jaho słoŭ, taktyka Pucina palahaje ŭ tym, kab maksimalna eskałavać kanflikt, i jon budzie heta rabić.
«I pa miery nabližeńnia pramiežkavych vybaraŭ u ZŠA [projduć 3 listapada — NN] jon budzie rabić heta ŭsio bolš aktyŭna», — prahnazuje ŭkrainski prezident.
Jon pravioŭ paralel pamiž padziejami, jakija ciapier adbyvajucca ŭ Kijevie, jaki štodnia zaznaje ad 300 da 500 atak, i budučymi vybarami ŭ Złučanych Štatach.
«Pamiatajcie, što ŭ 2022 hodzie ich metaj było prymusić ludziej pakinuć stalicu, kab dakazać: kali niama stalicy — niama i krainy. Ale naša kraina — heta bolš, čym prosta stalica, i stalica zastajecca mocnaj», — padkreśliŭ Zialenski.