Ryžankoŭ: Biełaruś hatovaja adnavić miechanizmy vajskovaj suviazi z NATA

Biełaruś hatovaja adnavić miechanizmy vajskovaj suviazi i ŭzajemadziejańnia z krainami NATA, kali dziaržavy aljansu taksama buduć hatovyja da hetaha. Pra heta ŭ intervju rasijskim prapahandystam z TASS zajaviŭ ministr zamiežnych spraŭ Biełarusi Maksim Ryžankoŭ.

Maksim Ryžankoŭ. Fota: Alexander Nemenov Pool Photo via AP

Pavodle jaho słoŭ, Minsk hatovy viarnucca da miechanizmaŭ vajskovaj vieryfikacyi, rańniaha papiaredžańnia i inšych mier prazrystaści. Ryžankoŭ adznačyŭ, što Biełaruś nie budzie pieraškadžać adnaŭleńniu takich miechanizmaŭ, kali krainy NATA prajaviać sustrečnuju hatoŭnaść.

Jon zajaviŭ, što Biełaruś nie była inicyjataram spynieńnia raniejšych kanałaŭ uzajemadziejańnia, abmienu infarmacyjaj i vajskovych abmiežavańniaŭ, u tym liku ŭ ramkach ABSIE i dvuchbakovych miechanizmaŭ. Adkaznaść za ich demantaž jon uskłaŭ na zachodnija krainy, zajaviŭšy, što jany imknulisia pašyryć mahčymaści vykarystańnia ŭzbrajeńniaŭ i pryciahnuć bolš dziaržaŭ da vykarystańnia stratehičnych uzbrajeńniaŭ.

Na dumku Ryžankova, adnaŭleńnie padobnych miechanizmaŭ mahło b źnizić ryzyku vajennych incydentaŭ i padvysić uzajemnuju pradkazalnaść. Navat abmiežavanyja miery rańniaha papiaredžańnia i vieryfikacyi, pavodle jaho słoŭ, dazvolili b bakam lepš razumieć dziejańni adzin adnaho i być bolš upeŭnienymi ŭ tym, što tyja ci inšyja kroki nie skiravanyja niepasredna suprać ich.

Kamientary da artykuła