Rasija atakavała Instytut jadziernych daśledavańniaŭ u Kijevie

Uviečary 30 vieraśnia rasijski bieśpiłotnik atakavaŭ Instytut jadziernych daśledavańniaŭ u Kijevie. Pra heta paviedamiła Dziaržaŭnaja inśpiekcyja jadziernaha rehulavańnia Ukrainy.

Fota: Wikimedia Commons

U vyniku ŭdaru na terytoryi instytuta ŭźnik pažar, jaki apieratyŭna patušyli. Nichto nie paciarpieŭ. Daśledčy jadzierny reaktar VVR-M i asnoŭnyja sistemy, jakija harantujuć jaho biaśpieku, paškodžańniaŭ nie atrymali. Źmienaŭ radyjacyjnaha fonu taksama nie zafiksavali. Ciapier śpiecyjalisty rasśledujuć abstaviny ataki i aceńvajuć naniesienuju škodu.

Z pačatku poŭnamaštabnaha rasijskaha ŭvarvańnia daśledčy reaktar u Kijevie znachodzicca ŭ spynienym stanie z całkam vyhružanaj aktyŭnaj zonaj. Jaho ekspłuatacyja abmiežavanaja rehłamientnym absłuhoŭvańniem sistem, važnych dla biaśpieki. Reaktar vykarystoŭvajecca jak krynica niejtronaŭ dla fundamientalnych i prykładnych daśledavańniaŭ u halinie jadziernaj fiziki.

Dziaržaŭnaja inśpiekcyja nazvała ŭdar pa instytucie parušeńniem mižnarodna pryznanych pryncypaŭ i normaŭ jadziernaj i radyjacyjnaj biaśpieki.

Heta nie pieršaja ataka na navukovuju ŭstanovu ŭ Kijevie za apošnija dni. 28 vieraśnia rasijski bieśpiłotnik trapiŭ u budynak Nacyjanalnaj akademii navuk Ukrainy. U vyniku ŭźnik mocny pažar, a ludzi akazaulisia zabłakavanymi ŭnutry i byli vymušanyja vybiracca praz vokny. Zahinuli dva čałavieki, u tym liku asistentka vice-prezidenta NAN Ukrainy Natalla Bukała. Sam vice-prezident, były kiraŭnik Ražy nacyjanalnaj biaśpieki i abarony Ukrainy Uładzimir Harbulin, atrymaŭ niaznačnyja traŭmy. Pa słovach prezidenta Ukrainy Uładzimira Zialenskaha, usiaho paciarpieli šeść čałaviek, u tym liku troje dziaciej.

Udar pa budynku Nacyjanalnaj akademii navuk prakamientavaŭ prezident Francyi Emanuel Makron. Jon zajaviŭ, što ataka stała śviedčańniem staŭleńnia rasijskaha kiraŭnictva da ŭkrainskaj navuki i adznačyŭ, što Francyja i Jeŭropa buduć praciahvać padtrymlivać Ukrainu.

Kamientary da artykuła