ZŠA vyklučyli hramadzianku Biełarusi z sankcyjnaha śpisu
Sankcyi źniatyja ŭ dačynieńni da Taćciany Pratapovič.
Fota: Getty Images / halbergman
Upraŭleńnie pa kantroli za zamiežnymi aktyvami Ministerstva finansaŭ ZŠA vyklučyła hramadzianku Biełarusi z sankcyjnaha śpisu, piša Reform.news.
Sankcyi źniatyja ŭ dačynieńni da Taćciany Pratapovič. Jana była ŭklučanaja ŭ śpis jak dyrektarka kiprskaj kampanii Centuronic Ltd u krasaviku 2024 hoda.
U zajavie amierykanskaha Minfina tady havaryłasia, što Centuronic źjaŭlajecca častkaj sietki irakskaj kampanii Black Shield Company for General Trading, jakaja naležyć pradprymalnikam Samiru Raji i Machamadu Dejry.
Kampanija zajmałasia prodažam zbroi, jakuju nabyvała, u tym liku, u biełaruskaha vytvorcy strałkovaj zbroi «Kidma Tek», jaki znachodzicca pad sankcyjami.
Pryčyny vyklučeńnia Pratapovič z sankcyjnych śpisaŭ nie nazyvajucca.