Premjer-ministr Bałharyi zaklikaŭ Jeŭropu pajści na sastupki Pucinu

Premjer-ministr Bałharyi Rumien Radzieŭ zajaviŭ, što Jeŭropie varta pierahledzieć suadnosiny vajskovych, ekanamičnych i dypłamatyčnych instrumientaŭ i nadać bolš uvahi dypłamatyi ŭ dačynieńniach z Rasijaj. Pavodle jaho słoŭ, heta nieabchodna dla źnižeńnia ryzyki jadziernaha kanfliktu i spynieńnia vajny va Ukrainie, piša Euronews.

Rumien Radzieŭ. Fota: AP Photo/Sergei Grits

Vystupajučy na samicie Euronews pa pytańniach abarony i kosmasu, Radzieŭ zajaviŭ, što Jeŭropa pavinna ŭličvać najhoršy mahčymy scenar i aceńvać ryzyki. Jon adznačyŭ, što ciapier robicca sproba dasiahnuć zvyčajnaj vajskovaj pieramohi nad najbujniejšaj jadziernaj dziaržavaj, ale nieabchodna ŭličvać najaŭnaść u Rasii jadziernaj zbroi.

Pavodle słoŭ bałharskaha premjera, patencyjał dypłamatyi jašče nie vyčarpany, tamu jeŭrapiejskim krainam varta bolš aktyŭna vykarystoŭvać dypłamatyčnyja kanały. Radzieŭ zajaviŭ, što Rasija moža pasprabavać vykarystać svaju «jadziernuju kartu», kali paličyć siabie asłablenaj abo zahnanaj u kut.

Radzieŭ taksama nahadaŭ, što ŭ lipieni Bałharyja zajaviła pra vychad z kaalicyi krain, jakija vystupajuć za praciah finansavaj i vajskovaj padtrymki Ukrainy. Jon raskrytykavaŭ dalejšyja pastaŭki zbroi Kijevu, zajaviŭšy, što kančatkovaja architektura miru budzie vyznačacca dypłamatyjaj, a nie pastaŭkami ŭzbrajeńniaŭ. Pavodle jaho słoŭ, nieabchodna adkryvać kanały kamunikacyi i bolš prysłuchoŭvacca adzin da adnaho.

Pry hetym bałharski premjer raskrytykavaŭ i vajaŭničyja zajavy rasijskaha kiraŭnictva, ale zaklikaŭ jeŭrapiejskich lidaraŭ uličvać mahčymyja nastupstvy dalejšaj eskałacyi.

Raniej Rumien Radzieŭ taksama zajaŭlaŭ pra niemahčymaść pieramohi Ukrainy nad Rasijaj i vystupaŭ suprać niekatorych sankcyj. Siarod inšaha jon krytyčna staviŭsia da sankcyj suprać patryjarcha Kiryła i kiraŭnika «Łukojła» Vahita Alekpierava.

Zajavy bałharskaha premjera prahučali na fonie novych papiaredžańniaŭ z boku Rasii nakont situacyi vakoł Kalininhradskaj vobłaści. Rasijskija dypłamaty ŭ niekalkich jeŭrapiejskich krainach abvinavacili NATA ŭ eskałacyi napružanaści i zajavili, što mahčymuju ahresiju suprać rehijona Rasija sustrenie maksimalna mocnym adkazam, u tym liku z vykarystańniem jadziernaj zbroi. Pavodle paviedamleńniaŭ, padobnaje papiaredžańnie było taksama nakiravanaje NATA pa zakrytych dypłamatyčnych kanałach.

Kamientary da artykuła