U Chajfie zabili 31‑hadovuju biełarusku Janinu. U jaje zastaŭsia dvuchmiesiačny syn
U zabojstvie padazrajuć muža Ali Masvada. A babula spadziajecca zabrać niemaŭla ŭ Biełaruś.
Janina Rusinava. Tut i dalej fota ź jaje sacsietak
U noč na 25 vieraśnia ŭ izrailskaj Chajfie zahinuła 31‑hadovaja biełaruska Janina Rusinava, jakuju ŭ miascovych miedyja nazyvajuć Jonit Masvada. U žančyny zastałosia dvuchmiesiačnaje niemaŭlo. Jaje 28‑hadovaha muža Ali zatrymali pa padazreńni ŭ zabojstvie, ale jon admaŭlaje vinu i śćviardžaje, što nibyta sprabavaŭ vyratavać žonku.
Maci Janiny žyvie ŭ Biełarusi. Pra śmierć dački žančyna daviedałasia tolki praź piać dzion. Ciapier jana choča zabrać unuka da siabie.
Trahiedyja adbyłasia ŭ Chajfie. Muž, Ali Masvada, sam patelefanavaŭ u palicyju. Kali miedyki pryjechali, žančyna ź ciažkim ranieńniem šyi znachodziłasia na leśvičnaj placoŭcy. Janinu ŭ krytyčnym stanie dastavili ŭ balnicu, ale vyratavać jaje nie ŭdałosia.
Palicyja zatrymała muža, ale jon admaŭlaje, što zabiŭ žonku. Advakat Ali pierakazaŭ jaho viersiju: maŭlaŭ, Janina paraniłasia sama, a jon sprabavaŭ jaje vyratavać. U samoha mužčyny taksama znajšli parezy.
«Ja ŭsim sercam sprabavaŭ jaje vyratavać», — skazaŭ Masvada padčas sudovaha pasiadžeńnia. Tym nie mienš jaho pakinuli pad vartaj. Rasśledavańnie praciahvajecca.
Janina naradziłasia ŭ Homieli, u 2017‑m skončyła Mazyrski dziaržaŭny piedahahičny ŭniviersitet pa śpiecyjalnaści «nastaŭnik historyi i hramadaznaŭstva». U Izraili jana žyvie prynamsi z 2023 hoda.
U Janiny zastałosia dvuchmiesiačnaje dzicia. Paśla hibieli chłopčyka pieradali ŭ ekstrannuju pryjomnuju siamju. Dalejšym losam dziciaci zajmajucca sacyjalnyja słužby Chajfy. Pavodle izrailskich miedyj, raniej siamja nie traplała ŭ pole zroku haradskoha viedamstva sacyjalnaj dapamohi.
Maci Janiny choča, kab unuk ros razam ź joj u Biełarusi. Ale pakul nieviadoma, ci dazvolać babuli zabrać chłopčyka i vyvieźci jaho ŭ Biełaruś.