Baćka Vani Ściacenki zapisaŭ videazvarot. Jon niezadavoleny, što błohiery pijaracca za košt jahonaj siamji

Mikita Ściacenka, baćka chłopčyka z myšačnaj dystrafijaj Dziušena-Biekiera, apublikavaŭ u instahramie videazvarot. U roliku mužčyna źviartajecca da biełarusaŭ — prosić ich nie vieryć tamu, jak historyju sa zboram srodkaŭ pakazvaje hrodzienski błohier Michaił Drahun, piša Hrodna.life.

Baćka Ivana Ściacenki: «My nie prasili rabić jaho niešta niezakonnaje»

Sud nad Michaiłam Drahunom padzialiŭ Hrodna: niekatoryja nie zrazumieli maci Ivana Alaksandru, jakaja nie padtrymała jaho ŭ sudzie.

Mikita Ściacenka pačynaje videa z taho, što maŭčaŭ zanadta doŭha, ale miaža jaho ciarpieńniu ŭžo nadyšła. Mužčyna padkreślivaje, što padziei raźvivalisia vakoł maleńkaha dziciaci z surjoznym zachvorvańniem — myšačnaj dystrafijaj Dziušena-Biekiera, pry jakoj čałaviek tracić mahčymaść chadzić i samastojna dychać.

«Niechta vyrašyŭ pieratvaryć čužuju biadu ŭ chajp, plotki, šou. U sprobu vystavić siabie hałoŭnym ratavalnikam. Nam nie patrebien byŭ chajp i papularnaść, nam patrebna była dapamoha, tamu što havorka išła pra žyćcio našaha syna Ivana», — kaža ŭ videa baćka.

Imia błohiera Mikita nie nazyvaje, ale pa ŭskosnych prykmietach stanovicca zrazumieła, što havorka idzie pra Michaiła Drahuna. U pryvatnaści, mužčyna kaža, što «čałaviek źjaviŭsia, kali było sabrana 50% ad nieabchodnaj sumy».

Baćka śćviardžaje, što paśla Drahun pieravioŭ 4% ad sabranaj na rozyhryšach sumy. Jašče 43% achviaravali nieabyjakavyja biełarusy.

«Kančatkova zbor zakryŭsia, kali pravaachoŭnyja orhany pierakanali asob, čyje bankaŭskija rachunki vykarystoŭvalisia, pieravieści nieabchodnuju sumu», — kaža baćka.

Mikitu Ściacenku aburyli śćviardžeńni błohiera, što bieź jaho dapamohi siamja nie zmahła b sabrać patrebnuju sumu na lačeńnie. Baćka zaklikaŭ Drahuna nie pierapisvać historyju i vykazaŭ padziaku za dapamohu.

«Ale čamu my dalej pavinny abaraniać jaho pierad zakonam i adkazvać za jahonyja dziejańni? My nie prasili jaho rabić niešta niezakonnaje; toje, z-za čaho ŭ nas potym źjavilisia prablemy».

Mikita Ściacenka śćviardžaje, što paśla zaviadzieńnia kryminalnaj spravy ŭ dačynieńni da Drahuna žoncy Alaksandry pryjšłosia najmać advakata, kab abaranić svaje pravy. Mužčyna taksama zaklikaŭ Drahuna nie zhadvać imia jaho žonki, a pry ŭźniknieńni jakich-niebudź pytańniaŭ raźbiracca ź im napramuju.

«Pakiń maju siamju ŭ spakoi. My i tak dastatkova pieražyli», — skazaŭ na zakančeńnie Mikita Ściacenka.

Michaił Drahun: «Darahaja, ty b atrymała try kapiejki»

U zakrytym telehram-kanale Michaił Drahun publikavaŭ videa, jakoje tyčyłasia jahonaj historyi z sudovym razboram. Tam jon pryznaŭ, što padčas chadajnictva ab źmianieńni miery strymańnia na pasiadžeńni prysutničała «paciarpiełaja maci dziciaci». Žančyna vystupiła suprać źmieny miery strymańnia dla Drahuna i paprasiła admović u zadavalnieńni chadajnictva.

«Nu i jaje pramova na sudzie, mamy, mianie taksama nie zadavoliła. Jana havaryła z takim pontam, što ja pavinien byŭ i abaviazany byŭ joj. Voś. Jana skazała, što ja zładziŭ z hetaha šoŭ i mnie było p***j na dzicia. Ja dumaŭ: b***, darahaja, kali b mnie było p***j, ty b atrymała try kapiejki», — kaža ŭ videa Drahun.

Pa padlikach błohiera, dziakujučy jaho dapamozie siamja atrymała nie mienš za 550 tysiač rubloŭ. Michaiła taksama abraziła, što jon nie atrymaŭ padziaki za svaju dziejnaść u zbory srodkaŭ. Pavodle jaho słoŭ, Alaksandra skazała, što dalejšy los Michaiła joj abyjakavy.

Užo paśla publikacyi rolika Mikity Ściacenki ŭ telehram-kanale Drahuna źjaviłasia novaje videa. Błohier skazaŭ, što dla abmierkavańnia hetaj temy «chopić adnaho kružočka».

«Hetaha kamientatara navat nie paklikali na sud, nie paličyli patrebnym. Mnie tak pryjemna, što vy pišacie tam pra mianie [u kamientarach pad videa — Hrodna.life]», — skazaŭ Drahun.

Paśla kamientaryi pad videa baćki byli vyklučanyja.

Ivanu Ściacenku ŭviali nieabchodny preparat u lutym 2026 hoda. Lačeńnie prachodziła ŭ dubajskaj klinicy. Paśla siamja viarnułasia ŭ Hrodna.

Hrodzienskamu błohieru Michaiłu Drahunu pryznačyli 1 hod i 6 miesiacaŭ pazbaŭleńnia voli ŭ lipieni 2026 hoda. Sudzili Michaiła za pryčynieńnie majomasnaj škody biez prykmiet kradziažu ŭ bujnym pamiery i paklop. Taksama Michaiła abaviazali apłacić advakata Alaksandry Ściacenki (1500 rubloŭ) i maralnuju kampiensacyju za paklop — 1700 rubloŭ.

Michaił Drahun vyjšaŭ na volu ŭ vieraśni 2026 hoda.

Kamientary da artykuła