Cichanoŭskaja sustrełasia ŭ Ńju-Jorku z Majkam Pampiea, jaki ŭ 2020‑m pryjazdžaŭ da Łukašenki

Na palach Hienieralnaj asamblei AAN u Ńju-Jorku Śviatłana Cichanoŭskaja praviała sustreču z byłym dziaržaŭnym sakratarom ZŠA Majkam Pampiea, jaki zajmaŭ hetuju pasadu padčas pieršaj administracyi Donalda Trampa.

Śviatłana Cichanoŭskaja i Majk Pampiea. Fota: pres-słužba Śviatłany Cichanoŭskaj

Asnoŭnaj temaj razmovy, jak paviedamlaje pres-słužba Śviatłany Cichanoŭskaj, stali padziei 2019—2020 hadoŭ i palityka ZŠA ŭ dačynieńni da Biełarusi ŭ toj pieryjad. Baki zakranuli sproby Vašynhtona pašyryć mahčymaści Biełarusi dla zachavańnia niezaležnaści i pamienšyć jaje enierhietyčnuju zaležnaść ad Rasii.

U lutym 2020 hoda Pampiea staŭ pieršym za 26 hadoŭ dziaržaŭnym sakratarom ZŠA, jaki naviedaŭ Biełaruś. Jaho vizit adbyvaŭsia na fonie naftavaha kanfliktu pamiž Minskam i Maskvoj. Pampiea tady zajaviŭ pra padtrymku Złučanymi Štatami suvierenitetu i niezaležnaści Biełarusi i paviedamiŭ, što amierykanskija enierhietyčnyja kampanii hatovyja zabiaśpiečyć krainu nieabchodnymi abjomami nafty pa kankurentnych cenach.

Paźniej Pampiea apisaŭ hety pieryjad u svaich miemuarach «Nikoli nie sastupaj ni cali» (Never Give an Inch: Fighting for the America I Love). U knizie jon krytyčna charaktaryzuje Alaksandra Łukašenku jak palityka staroj savieckaj škoły, hałoŭnaj metaj jakoha było zachavańnie ŭłasnaj ułady.

Pavodle Pampiea, Łukašenka razumieŭ niebiaśpieku poŭnaj zaležnaści ad Maskvy, pakolki mahčymaść pahłynańnia Biełarusi Rasijaj mahła pahražać i jaho ŭłasnamu stanovišču. Tamu na praciahu mnohich hadoŭ jon sprabavaŭ bałansavać pamiž Rasijaj i Zachadam.

Pampiea taksama tłumačyć palityku Vašynhtona ŭ pačatku 2020 hoda žadańniem dać Biełarusi realnuju alternatyvu rasijskaj zaležnaści, u tym liku praz mahčymaść pastavak amierykanskaj nafty. Adnak paśla vybaraŭ Łukašenka, pavodle hetaj acenki, zrabiŭ vybar na karyść hvałtu i represij suprać biełarusaŭ, što istotna zvuziła mahčymaści dla dalejšaha manieŭravańnia pamiž Zachadam i Rasijaj.

Kamientary da artykuła