Ajcišnik pajechaŭ z Łodzi na śviaty ŭ Biełaruś i trapiŭ za kraty. Što pra jaho viadoma
Uładzisłaŭ Marčyk paśpiachova pracavaŭ fullstack-raspracoŭščykam, žyŭ u polskaj Łodzi. U kancy 2025 hoda jon vyrašyŭ naviedać radzimu i prapaŭ. Jak vyjaviłasia, 27‑hadovaha talenta asudzili pa dvuch kryminalnych artykułach — za «abrazu Łukašenki» i «raspalvańnie varožaści».
Uładzisłaŭ Marčyk. Fota ź jahonaj staronki Ukantakcie
Uładzisłavu Marčyku 27 hadoŭ. U 2020 hodzie skončyŭ Biełaruski dziaržaŭny ŭniviersitet infarmatyki i radyjoelektroniki (BDUIR).
Marčyk — prahramist, byŭ fullstack-raspracoŭščykam, pisaŭ na C# i Angular, pracavaŭ z płatformaj.NET. Apošnimi hadami ajcišnik žyŭ u Polščy, u Łodzi.
Uładzisłaŭ cikaviŭsia videahulniami (Dota 2, Sekiro, The Witcher) i historyjaj.
U kancy 2025 hoda Uładzisłaŭ pajechaŭ na radzimu. Imavierna, mienavita padčas hetaj pajezdki na navahodnija śviaty abo nieŭzabavie paśla jaje ajcišnik byŭ aryštavany.
Niadaŭna nad Uładzisłavam adbyŭsia sud. 4 vieraśnia 2026 hoda nabyŭ zakonnuju moc prysud Minskaha haradskoha suda. Marčyka pryznali vinavatym pavodle č. 1 art. 130 (raspalvańnie inšaj sacyjalnaj varožaści) i č. 1 art. 368 (abraza Łukašenki) Kryminalnaha kodeksa.
Padrabiaznaści spravy nieviadomyja. Chłopcu prysudzili chimiju z nakiravańniem.
Pravaabaroncy nie raz papiaredžvali, što siłaviki cikujuć za biełarusami, jakija viartajucca z-za miažy. Ludziej praviarajuć i kidajuć za kraty za staryja kamientary, dapamohu represavanym abo achviaravańni, šyjučy im kryminalnyja spravy za «raspalvańnie varožaści» ci «sadziejničańnie ekstremisckaj dziejnaści».
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.