U Smalavičach zatapiła centr horada. Kamunalniki vinavaciać vilhotnyja survetki

Žychary Smalavičaŭ užo druhi dzień nazirajuć u centry horada pracu śpiectechniki kamunalnych słužbaŭ. Paśla niadaŭniaha surjoznaha zasoru na vulicy Kamsamolskaj adbyłasia novaja avaryja, u vyniku jakoj kanalizacyjnyja ścioki pajšli ŭ padvały haradskoha Doma kultury i raźmieščanaha pobač dziciačaha sada, piša vydańnie Smolevichi24.by.

Fota: smolevichi-24.by

Dyrektar Smalavickaha vodakanała Jaŭhien Mikałajeŭ raskazaŭ, što novy zasor pačali likvidavać jašče ŭ druhoj pałovie dnia 9 vieraśnia. Rabotniki pradpryjemstva pracavali da 23‑j hadziny, a ranicaj 10 vieraśnia praciahnuli raboty.

Pryčynaj avaryi stali vialikija korki ź vilhotnych survetak i anuč, jakija ludzi zmyvajuć va ŭnitazy. Jany zabłakavali kanalizacyjny kalektar, paśla čaho ścioki pačali vychodzić u padvalnyja pamiaškańni.

Fota: smolevichi-24.by

Kamunalniki pračyścili ŭžo amal paŭkiłamietra kanalizacyjnych sietak. Dla likvidacyi zasoru zadziejničali hidradynamičnuju mašynu, jakaja pramyvaje truby pad vysokim ciskam, i mahutnuju vakuumnuju mašynu. Značnuju častku śmiećcia, adnak, davodzicca dastavać uručnuju.

Fota: smolevichi-24.by

Tolki za viečar rabotniki vyniali z kałodzieža kala 10 viodraŭ śmiećcia. Usiaho ŭžo dastali bolš za 200 kiłahramaŭ źlažałych survetak i anuč, ale kałodziež usio jašče zastajecca zapoŭnienym.

Kali prabić zasor nie ŭdasca, kamunalnikam moža spatrebicca pierakapać usiu płošču ŭ centry horada. Kalektary tam znachodziacca na hłybini kala piaci mietraŭ, a ŭ hruncie jość płyvun. Dla prakładki adnaho kalektara moža spatrebicca katłavan šyrynioj nie mienš za šeść mietraŭ. Takija raboty buduć składanymi i darahimi, a na ich vykanańnie moža spatrebicca nie mienš za miesiac.

Fota: smolevichi-24.by

Dyrektar vodakanała zaklikaŭ žycharoŭ nie zmyvać va ŭnitazy vilhotnyja survetki, vilhotnuju tualetnuju papieru, srodki hihijeny, padhuźniki, anučy i reštki ježy. Hetyja rečy nie rastvarajucca ŭ vadzie, nazapašvajucca ŭ trubach, mohuć paškodžvać pompy i pryvodzić da zatapleńnia padvałaŭ damoŭ i roznych ustanoŭ.

Žycharam rajać pastavić u prybiralni zvyčajnuju śmietnicu i vykidać takoje śmiećcie ŭ jaje, a nie ŭ kanalizacyju.

Kamientary da artykuła