Biełarusa ŭ Rasii asudzili na 25 hadoŭ za padrychtoŭku dyviersii ŭ Novarasijsku
Paŭdniovy akruhovy vajskovy sud pryznaŭ hramadzianina Biełarusi Maćvieja Kitava vinavatym u padrychtoŭcy dyviersii ŭ Novarasijsku pa zadańni supracoŭnika Słužby biaśpieki Ukrainy. Mužčyna nibyta płanavaŭ padarvać punkt adboru hramadzian na vajskovuju słužbu pavodle kantrakta, ale byŭ vykryty i zatrymany supracoŭnikami UFSB pa Krasnadarskim krai, paviedamlaje rasijskaje ahienctva TASS.
Skrynšot ź videa
Pavodle materyjałaŭ suda, u śniežni 2024 hoda Maćviej Kitaŭ, znachodziačysia ŭ Krasnadary, pačaŭ pierapisku z čałaviekam, jaki pradstaviŭsia supracoŭnikam SBU. Biełarus nibyta pahadziŭsia na kanfidencyjnaje supracoŭnictva. 26 lutaha 2025 hoda jon atrymaŭ zadańnie ździejśnić dyviersiju z vykarystańniem samarobnaha vybuchovaha prystasavańnia.
U lutym 2025 hoda Kitaŭ, jak śćviardžajecca, pryjechaŭ u Novarasijsk, zabraŭ z tajnika kampanienty dla vyrabu vybuchovaha prystasavańnia i pieramiaściŭ ich u inšaje miesca. Da hetaha jon atrymaŭ ad svajho kuratara instrukcyi pa zborcy i aktyvacyi prystasavańnia.
Na sudzie mužčyna całkam pryznaŭ vinu i raskazaŭ, što atrymaŭ ad supracoŭnika SBU 805 dalaraŭ za vykanańnie zadańnia.
Sud pryznačyŭ jamu 25 hadoŭ pazbaŭleńnia voli ŭ kałonii strohaha režymu. Pieršyja piać hadoŭ biełarus pavinien pravieści ŭ turmie. Akramia taho, Maćvieja Kitava aštrafavali na 300 tysiač rasijskich rubloŭ (kala 3530 dalaraŭ).
Kampanienty dla vyrabu vybuchovaha prystasavańnia byli kanfiskavanyja supracoŭnikami UFSB pa Krasnadarskim krai, jakija rasśledavali kryminalnuju spravu.
Čytajcie taksama:
Padazravany ŭ dyviersii ŭ Lejpcyhu atrymaŭ vizu ŭ pasolstvie Italii ŭ Minsku
Viadučy polski raźviedčyk pra biełaruski KDB, Ivana Cierciela i dyjałoh ź Minskam