Si Dzińpin nie płanuje sustrakacca z Pucinym na samicie BRIKS u Indyi

Staršynia KNR Si Dzińpin nie budzie pravodzić asobnuju dvuchbakovuju sustreču z Uładzimiram Pucinym padčas samitu BRIKS u Ńju-Deli. Pra heta paviedamiŭ pamočnik prezidenta Rasii Juryj Ušakoŭ, piša The Moscow Times.

Si Dzińpin i Uładzimir Pucin. Fota: Kremlin.ru

Pavodle słoŭ Ušakova, aficyjnyja pieramovy Pucina i Si Dzińpina ŭ ramkach samitu nie zapłanavanyja. Pry hetym pamočnik rasijskaha lidara nie vyklučyŭ, što kiraŭniki Rasii i Kitaja mohuć pahutaryć niefarmalna, u kułuarach i «na nahach», pravioŭšy karotkuju sustreču biez aficyjnaha pratakołu.

Apošni raz Pucin i Si Dzińpin sustrakalisia 31 žniŭnia ŭ Biškieku na pasiadžeńni Rady kiraŭnikoŭ dziaržaŭ — členaŭ Šanchajskaj arhanizacyi supracoŭnictva. Adnak tady im nie ŭdałosia dasiahnuć prahresu ŭ pytańni budaŭnictva hazapravoda «Siła Sibiry-2», pa jakim Rasija płanuje pastaŭlać u Kitaj da 50 miljardaŭ kubamietraŭ hazu ŭ hod.

Pavodle infarmacyi vydańnia South China Morning Post, baki nie zmahli damovicca pra košt hazu. Kitaj raźličvaje płacić kala 50 dalaraŭ za tysiaču kubamietraŭ — prykładna stolki ž, kolki płaciać rasijskija spažyŭcy, albo 120—130 dalaraŭ — pa canie dla rasijskich pramysłovych spažyŭcoŭ.

Rasija prapanuje pryviazać košt hazu da cany, jakaja dziejničaje dla pastavak pa hazapravodzie «Siła Sibiry-1» — kala 250—260 dalaraŭ za tysiaču kubamietraŭ. Heta prykładna na 40% nižej za siaredniuju canu «Hazproma» dla kupcoŭ u inšyja krainy, jakaja składaje kala 420 dalaraŭ za tysiaču kubamietraŭ.

Kamientary da artykuła