Vyznačyli praviły dla dziejnaści dabračynnych fondaŭ, jakija źbirajuć hrošy na lačeńnie

Alaksandr Łukašenka 7 vieraśnia padpisaŭ ukaz №304 «Ab fondach i dabračynnaj dziejnaści ŭ śfiery achovy zdaroŭja». Dakumient vyznačaje praviły pracy dabračynnych fondaŭ u hetaj śfiery i ŭdakładniaje ahulnyja normy, jakija tyčacca ich stvareńnia i dziejnaści, piša BiełTA.

Hrodzienskamu chłopčyku Vaniu Ściacenku ŭvodziać preparat «Elevidzis» koštam 2,9 miljona dalaraŭ, na jaki sabrali hrošy ludzi. Z hetaj spravaj byŭ źviazany vialiki skandał z błohierami Michaiłaj Drahanom i Jaŭhienijaj Tarasienka, jakija značnuju častku sabranych na patreby Vani hrošaj tracili na samich siabie

Ukaz zamacoŭvaje paniaćcie dabračynnaj dziejnaści ŭ śfiery achovy zdaroŭja, a taksama vyznačaje, chto moža ŭdzielničać u jaje arhanizacyi i finansavańni.

Asobna prapisany paradak zboru hrošaj na miedycynskuju dapamohu i ich metavaha vykarystańnia. Taksama vyznačana, što rabić z hrašyma, sabranymi zvyš ustanoŭlenaha limitu, abo srodkami, jakija zastalisia niezapatrabavanymi. Praduhledžany i miechanizm kantrolu za rucham hrošaj dy tym, kab jany vykarystoŭvalisia pa pryznačeńni.

Novym ukazam taksama zaćvierdžana ŭ novaj redakcyi pałažeńnie ab stvareńni, dziejnaści i likvidacyi fondaŭ. Udvaja pavialičvajecca minimalny pamier majomaści, nieabchodny dla stvareńnia i pracy fondaŭ u śfiery achovy zdaroŭja.

Akramia taho, vyznačajucca dapuščalnyja pamiery vydatkaŭ fondaŭ na zarobki i inšyja vypłaty supracoŭnikam, a taksama na pradprymalnickuju dziejnaść. Pry hetym zabaraniajecca vykarystoŭvać dla pradprymalnickich metaŭ achviaravańni hramadzian i jurydyčnych asob.

Ułady čakajuć, što realizacyja ŭkaza dapamoža praduchilić niametavaje vykarystańnie sabranych srodkaŭ, zrobić pracu fondaŭ bolš prazrystaj i ŭzmocnić kantrol za ich dziejnaściu. Akramia taho, dakumient pavinien uparadkavać dabračynnuju dziejnaść u śfiery achovy zdaroŭja.

Kamientary da artykuła