U Papua — Novaj Hviniei złavili rybu, jakuju nie bačyli bolš za 40 hadoŭ

U račnoj sistemie Siepik u Papua — Novaj Hviniei znoŭ złavili špinatnaha mikrafisa (Microphis spinachioides) — redkuju presnavodnuju rybu, jakuju navukoŭcy nie rehistravali z 1980‑ch hadoŭ, paviedamlaje vydańnie Discover Wildlife.

Skrynšot ź videa

Siepik — adna z najbujniejšych račnych sistem rehijonu, jakaja praciahnułasia bolš čym na 1100 kiłamietraŭ i ŭklučaje šmatlikija prytoki, aziory, lasy i zabałočanyja terytoryi. Dla miascovych žycharoŭ raka źjaŭlajecca asnoŭnym šlacham pieramiaščeńnia, a pamiž vioskami časta davodzicca dabiracca na łodkach i kanoe niekalki hadzin.

Fota: New Guinea Binatang Research Centre

Daśledčyki Džeryka Ahieba i Rodžer Majkiej na praciahu dvuch tydniaŭ vyvučali Siepik i razmaŭlali ź miascovymi supolnaściami. Vyśvietliłasia, što žychary niekatorych viosak viedali hetuju redkuju rybu i mahli paznać jaje pa fotazdymkach.

Važnuju rolu ŭ jaje paŭtornym vyjaŭleńni adyhrała miascovaja rybačka Chielen Asu. Jana łović presnavodnych krevietak tradycyjnym ručnym sačkom «umbien» i raskazała navukoŭcam, što ŭžo niekalki razoŭ sustrakała špinatnaha mikrafisa.

Fota: New Guinea Binatang Research Centre

Na nastupnuju ranicu Chielen vyjšła na raku i złaviła dźvie takija rybiny. Fatahrafii znachodki daśledčyki pakazali aŭstralijskamu ichtyjołahu Džeraldu Alenu, jaki jašče ŭ 1980‑ch hadach paćvierdziŭ isnavańnie hetaha vidu ŭ Siepiku. Jon taksama zmoh identyfikavać znojdzienuju rybu jak špinatnaha mikrafisa.

Navukoŭcy adznačyli, što bieź viedaŭ i dapamohi miascovych žycharoŭ paŭtornaje vyjaŭleńnie redkaha vidu mahło b i nie adbycca. Daśledčyki padkreślivajuć, što ŭ takich addalenych rehijonach navukovaja praca šmat u čym zaležyć ad supracoŭnictva ź miascovymi supolnaściami.

Kamientary da artykuła