Arcybiskup Kandrusievič viarnuŭsia da słužby paśla miesiaca lekavańnia

Ijerarch naviedaŭ Rakaŭ.

Nieŭzabavie paśla zaviaršeńnia reabilitacyi z pryčyny apieracyi na sercy arcybiskup-emieryt Tadevuš Kandrusievič viarnuŭsia da aktyŭnaha słužeńnia. 80‑hadovy ijerarch ździejśniŭ pieršy paśla chvaroby dušpastyrski vizit — u parafiju ŭ Rakavie, piša katolik.life.

Tut 23 žniŭnia śviatkavali 30‑hodździe parafijalnaha choru. Z hetaj nahody parafija zaprasiła arcybiskupa ŭznačalić śviata ŭ kaściole. Jon dałučyŭsia navat da śpievaŭ choru, jak zaŭvažna na apublikavanych parafijaj zdymkach.

Na praciahu miesiaca hanarovy ijerarch, jaki časta naviedvaje parafii ŭ roznych kutkach Biełarusi, niahledziačy na ŭzrost i chvaroby, nie mieŭ mahčymaści ździajśniać dušpastyrskija vizity. Jaho terminova špitalizavali 22 lipienia paśla ŭdziełu ŭ feście ŭ Hudahai. Dziakujučy hetamu praduchilili čarhovy infarkt i praviali stenciravańnie sasudaŭ.

Vierniki malilisia ab chutčejšym vyzdaraŭleńni arcybiskupa-emieryta i praciahvajuć prasić Boha pra nieabchodnyja łaski dla jaho.

Kamientary da artykuła