Što viadoma pra straty Rasii va Ukrainie na kaniec žniŭnia?
Bi-bi-si sumiesna z «Miedyjazonaj» i kamandaj vałancioraŭ ustanaviła imiony 241 088 rasijskich vajskoŭcaŭ, jakija zahinuli z pačatku poŭnamaštabnaha ŭvarvańnia va Ukrainu. Realnaja kolkaść zahinułych vyšejšaja: paimienny śpis zasnavany tolki na publična dastupnych danych.
Fota: AP
56% usich zahinułych — heta dobraachvotniki, mabilizavanyja i asudžanyja, jakija adpravilisia vajavać ź miescaŭ pazbaŭleńnia voli, to-bok ludzi, nijak nie źviazanyja z armijaj na momant pačatku vajny.
Siaredni ŭzrost zahinułych sa śpisu ciapier składaje 38 hadoŭ. Heta na 13 hadoŭ bolš, čym u pieršyja miesiacy ŭvarvańnia.
U toj pieryjad asnoŭnyja apieracyi pravodzilisia siłami elitnych padraździaleńniaŭ, u jakich słužyli maładyja ludzi, jakija prajšli ŭzmocnienuju padrychtoŭku.
Ciapier asnoŭnaj krynicaj papaŭnieńnia armii stali ludzi, jakija prychodziać u vojska z «hramadzianki» i traplajuć na front paśla niepraciahłaj padrychtoŭki.
Dobraachvotniki ciapier — samaja «ŭzrostavaja» katehoryja siarod zahinułych. Siarod tych, chto niadaŭna padpisaŭ kantrakt, čaściej za ŭsio hinuć mužčyny va ŭzroście 42—45 hadoŭ. Pry hetym 2776 zahinułych dobraachvotnikaŭ byli starejšyja za 60 hadoŭ.
Taksama na vajnie zahinuli 6435 mužčyn va ŭzroście da 24 hadoŭ.
Takoje raźmierkavańnie pavodle ŭzrostu adlustroŭvaje evalucyju miechanizmu kamplektavańnia rasijskaj armii.
Paśla palityčna balučaj mabilizacyi 2022 hoda ŭłady zrabili staŭku na hrašovyja vypłaty i decentralizavany nabor kantraktnikaŭ praz rehijony. Hetaja sistema doŭhi čas dazvalała rasijskim uładam kampiensavać straty armii biez abviaščeńnia novaj chvali mabilizacyi.
Asnoŭnyja tendencyi
Na dobraachvotnikaŭ ciapier prypadaje 36% usich paćvierdžanych strat.
Dola asudžanych praciahvaje źnižacca: ciapier jany składajuć 11% usich zahinułych, choć u 2023 hodzie kožny piaty zahinuły byŭ zavierbavany na vajnu ź miescaŭ pazbaŭleńnia voli.
Ale skaračeńnie doli asudžanych nie aznačaje, što rasijskaja armija stała radziej nabirać ludziej praź pienitencyjarnuju sistemu. Z 2024 hoda isnuje mahčymaść padpisać kantrakt jašče da suda: dla abvinavačanaha heta stanovicca sposabam paźbiehnuć mahčymaha turemnaha terminu. Adnak viadomyja vypadki, kali rašeńnie adpravicca na front abvinavačanyja prymali pad ciskam — u tym liku praz strach atrymać surovy prysud abo nie vytrymać cisku sistemy ŭ miescach źniavoleńnia.
U hetaj statystycy takija vajskoŭcy ŭličvajucca jak dobraachvotniki, pakolki na momant padpisańnia kantraktu jany jašče nie byli asudžanyja i nie adbyvali pakarańnie.
Na dolu mabilizavanych u śpisie siońnia prypadaje kala 8% usich zahinułych. Hetaja hrupa prykmietna maładziejšaja za astatnich: siaredni ŭzrost zahinułych tut — 32 hady. Amal pałova ź ich (42%) zahinuła ŭ pieršy hod paśla abviaščeńnia častkovaj mabilizacyi vosieńniu 2022 hoda, jakaja farmalna tak i nie zavieršanaja.
Analiz danych pakazvaje, što čaściej za ŭsio kantrakt padpisvajuć žychary nievialikich haradoŭ i viosak, dzie stabilnaj i dobra apłačvanaj pracy nie chapaje, a ahitacyja miascovych uładaŭ moža być bolš nastojlivaj, čym u bujnych haradach.
Za hady ŭvarvańnia Rasija straciła zabitymi bolš za 7642 aficery, pryčym 77% ź ich — kamandziry małodšaha źviana. Mienavita małodšyja aficery (u zvańniach ad małodšaha lejtenanta da kapitana) adyhryvajuć klučavuju rolu ŭ bajavych umovach, zabiaśpiečvajučy suviaź pamiž asnoŭnaj masaj sałdat i kamandzirami, jakija adkazvajuć za płanavańnie apieracyj.
Jakija realnyja ličby strat?
Realnyja straty rasijskaha boku bolšyja za kolkaść zahinułych, imiony jakich udajecca paćvierdzić pa adkrytych krynicach.
Pavodle acenak vajennych ekśpiertaŭ, vyniki našaha analizu rasijskich mohiłak, voinskich miemaryjałaŭ i niekrałohaŭ mohuć achoplivać ad 45% da 55% realnaj kolkaści zahinułych.
Nie pra ŭsie śmierci paviedamlajecca publična. Akramia taho, cieły značnaj kolkaści vajskoŭcaŭ, jakija zahinuli ŭ apošnija miesiacy, da hetaha času zastajucca na poli boju. Sproby ich evakujavać źviazanyja z surjoznaj niebiaśpiekaj dla žyvych — u pieršuju čarhu praz pahrozu ŭdaraŭ bieśpiłotnikaŭ.
Zychodziačy z acenak ekśpiertaŭ, realnaja kolkaść zahinułych z rasijskaha boku moža składać ad 438 342 da 535 751 čałavieka.
Ahulnaja ličba stanovicca prykmietna vyšejšaj, kali ŭličvać tych, chto vajavaŭ suprać Ukrainy ŭ składzie padraździaleńniaŭ samaabvieščanych DNR i ŁNR, a taksama straty padraździaleńniaŭ Paŭnočnaj Karei, jakija vajavali na terytoryi Kurskaj vobłaści Rasii.
Analiz niekrałohaŭ i publikacyj 2022 hoda pra źnikłych bieź viestak bajcoŭ z ŁNR i DNR dazvalaje mierkavać, što da kanca 2022 hoda zahinuli 21 000—23 500 čałaviek.
Vyvučyŭšy spadarožnikavyja zdymki i aficyjnyja fatahrafii novaha vajennaha miemaryjała zahinułych, pabudavanaha ŭ KNDR, karejskaja słužba Bi-bi-si ŭstanaviła imiony 2304 karejskich sałdat, jakija vajavali na baku rasijskich sił i zahinuli ŭ 2024—2025 hadach.
Takim čynam, pavodle sabranych danych, sukupnyja straty prarasijskich sił mohuć znachodzicca ŭ dyjapazonie ad 461 646 da 561 555 vajskoŭcaŭ.
Ukraina apošni raz paviedamlała pra svaje straty ŭ lutym 2026 hoda. Tady prezident Uładzimir Zialenski pryznaŭ hibiel 55 tysiač ukrainskich sałdat i aficeraŭ. Zachodnija ekśpierty ličać, što pryviedzienaja Zialenskim ličba strat, chutčej za ŭsio, zanižanaja.
Paimienny śpis strat ukrainskaha boku na asnovie adkrytych krynic viadzie ananimny sajt Ukraine losses — ciapier u im 103 418 proźviščaŭ zahinułych vajskoŭcaŭ.
Ukraine losses taksama pakazvaje, što z ulikam publikacyj pra źnikłych bieź viestak ahulnaja kolkaść zahinułych vajskoŭcaŭ z ukrainskaha boku moža dasiahać 212 974 čałaviek.