Sieviaryniec: Kali biełarus ź biełarusam nie budzie razmaŭlać pa-biełarusku — Biełarusi nie budzie
Palitviazień i palityk Pavieł Sieviaryniec ličyć, što kožny, chto vystupaje suprać režymu, musić razmaŭlać na biełaruskaj movie. Jon taksama ŭchvaliŭ usich papularnych palitykaŭ, chto robić pieršyja kroki ŭ piersanalnaj biełarusizacyi.
«Biełarusy buduć razmaŭlać na toj movie, na jakoj razmaŭlaje načalstva. U nas pa-biełarusku ŭžo razmaŭlaje prezident-elekt. Viktar Babaryka pačynaje razmaŭlać pa-biełarusku — i heta kłas. Biełarusy bačać, što elita razmaŭlaje pa-biełarusku, i budzie rabić hetak ža», — skazaŭ jon na kanfierencyi «Novaja Biełaruś».
Pry hetym Sieviaryniec pryznaje, što biełarusam nie staje biełaruskamoŭnaha ŭniviersiteta dla padrychtoŭki mocnych kadraŭ na budučyniu.
«Vorah idzie tudy, dzie paciarpieli parazu śviatar i nastaŭnik. Jeŭrapiejcy kažuć, što ŭ nas jość EHU. Ale EHU nie biełaruski univiersitet. Nam patrebny ŭniviersitet, dzie na biełaruskaj movie vykładali b nobieleŭski łaŭreat Aleś Bialacki, Vincuk Viačorka, Kaciaryna Vadanosava. Moładź pajšła b tudy vałam. Dy i mnie choć pad 50, ale ja b sam pajšoŭ vučycca ŭ taki ŭniviersitet».