U Varšavie abrabavali i sprabavali skraści biełarusa, kali jon kłaŭ hrošy na rachunak
Piaciora hruzinaŭ u Varšavie abrabavali 25‑hadovaha biełarusa i sprabavali zaciahnuć jaho ŭ svaju mašynu.
Palicyja ŭžo zatrymała padazravanych, im pahražaje da 20 hadoŭ pazbaŭleńnia voli, piša Most.
Uviečary 30 lipienia na vulicy Dobaša 25‑hadovy hramadzianin Biełarusi padyšoŭ da bankamata ź vialikaj sumaj najaŭnych hrošaj. Kali mužčyna ŭnosiŭ srodki na bankaŭski rachunak, da jaho padyšli piaciora hramadzian Hruzii.
Jany pasprabavali zaciahnuć biełarusa ŭ aŭtamabil. Kali jon pačaŭ supraciŭlacca, napadniki pavalili jaho na ziamlu i pačali bić rukami pa hałavie. Paśla hetaha jany zabrali barsietku, mabilny telefon i kala 20 tysiač złotych najaŭnymi (kala 4650 jeŭra).
Biełarus atrymaŭ cialesnyja paškodžańni hałavy. Palicejskija, jakija prybyli na miesca zdareńnia, akazali jamu pieršuju dapamohu.
Palicyja ŭstanaviła miescaznachodžańnie padazravanych u razbojnym napadzie. Na nastupny dzień ich zatrymali ŭ vioscy Duchnaŭ, jakaja znachodzicca za 15 kiłamietraŭ na ŭschod ad Varšavy. Uzrost zatrymanych — ad 23 da 29 hadoŭ. Padčas śledčych dziejańniaŭ była znojdziena častka vykradzienaha.
Hruzinam vystavili abvinavačańnie ŭ razbojnym napadzie, ździejśnienym hrupaj asobaŭ pa papiaredniaj zmovie, sa sprobaj pazbavić achviaru svabody. Usich abvinavačanych aryštavali na try miesiacy.
Zhodna z polskim Kryminalnym kodeksam, za razboj, ździejśnieny hrupaj asobaŭ, praduhledžana pakarańnie ad troch da 20 hadoŭ pazbaŭleńnia voli.