U Dubrovienskim rajonie znajšli abłomki savieckaha źniščalnika

U Dubrovienskim rajonie padčas pošukavaj ekśpiedycyi znajšli abłomki savieckaha źniščalnika Jak-1 i pareštki piaci čyrvonaarmiejcaŭ, asoby jakich pakul nie ŭstanoŭleny, paviedamiła vydańnie «Vitiebskije novosti».

Fota: vitvesti.by

Pošuki pravodzili bajcy 52‑ha asobnaha śpiecyjalizavanaha pošukavaha bataljona Ministerstva abarony razam ź minskim pošukavym atradam «Baćkaŭščyna». Miesca raskopak było vyznačana pavodle ŭspaminaŭ žycharoŭ viosak Kazły i Panizoŭje. Pa mierkavańni pošukavikaŭ, vajskoŭcy zahinuli padčas vosieńskaha nastupleńnia 1943 hoda.

Pry raskopkach byli znojdzienyja kaski, kaciałok, dźvie vintoŭki, a taksama frahmienty amunicyi i vajskovaj formy. Adnak śmiarotnych miedaljonaŭ ci inšych imiannych rečaŭ nie vyjavili, tamu identyfikavać zahinułych pakul niemahčyma.

Najbolš značnaj znachodkaj stali reštki savieckaha źniščalnika Jak-1. Samalot urezaŭsia ŭ ziamlu na vialikaj chutkaści i mocna raźbiŭsia, adnak pošukavikam udałosia padniać asnoŭnyja elemienty kanstrukcyi, a taksama ŭzbrajeńnie — dźvie kulamiotnyja ŭstanoŭki i adnu harmatu. Ciapier śpiecyjalisty šukajuć na detalach zavodskija numary, kab praz archiŭ Ministerstva abarony vyśvietlić bajavy šlach samalota i, mahčyma, vyznačyć asobu jaho apošniaha piłota.

Akramia taho, ź miesca raskopak dastali bolš za 150 vybuchovaniebiaśpiečnych pradmietaŭ, jakija pieradali sapioram dla abiasškodžańnia.

Usie znojdzienyja artefakty časova zachoŭvajucca ŭ milicyi. Paśla zaviaršeńnia nieabchodnych pracedur ich pieradaduć u Dubrovienski historyka-krajaznaŭčy muziej.

Kamientary da artykuła